Luís Menor, investido presidente da Deputación de Ourense
Luís Menor, investido presidente da Deputación de Ourense
Obtivo o alcalde do Pereiro de Aguiar os doce votos do seu partido, o PP
Manuel Baltar presentou hoxe a solicitude para poder reincorporarse á súa praza como alto funcionario da Xunta
Luís Menor, home da máxima confianza do presidente da Xunta e do PPdeG Alfonso Rueda Valenzuela, converteuse este luns no novo presidente da Deputación de Ourense, e a súa designación puxo fin aos 33 anos da familia Baltar á fronte.
José Luis Baltar desempeñou o liderado durante 22 anos, e 11 o seu fillo Manuel Baltar, que renunciou a revalidar o cargo. Manuel Baltar ten un xuízo pendente pola presunta comisión dun delito contra a seguridade viaria ao circular a 215 quilómetros por hora na A-52.
O pacto que o PP alcanzou con Democracia Ourensá para deixar gobernar as listas máis votadas no Concello (Gonzalo Pérez Jácome, con DO) e a Deputación (o PP) permitiu aos populares reter a Deputación, pois nas pasadas municipais o partido non recuperou a maioría absoluta.
Ningún alcanzou a maioría absoluta na primeira votación á man alzada. O PSOE votou o seu candidato Alvaro Vila, e Democracia Ourensá o seu, Armando Ojea. Menor foi elixido na segunda oportunidade, que unicamente require de maioría simple, e prometeu o cargo cinco minutos antes das doce e media. Obtivo o alcalde do Pereiro de Aguiar os doce votos do seu partido.
Manuel Baltar presentou nesta mesma xornada a solicitude para poder reincorporarse á súa praza como alto funcionario da Xunta.
A sesión plenaria comezou puntual nun concorrido salón de plenos en que estiveron tanto Rueda como o último titular da entidade Manuel Baltar, e, entre outros, o presidente do Parlamento de Galicia Miguel Santalices. Rosendo Fernández foi o primeiro en tomar posesión, dos 25 deputados provinciais.
Luís Menor, que se emocionou no seu discurso, ten pendente agora decidir sobre a presidencia e a folla de ruta que seguirá na súa nova encomenda, que, segundo dixo, asume "con responsabilidade" e "esixencia".
"Todo un desafío que ten un punto de partida, un acto grande de xenerosidade do que foi presidente desta institución durante once anos", manifestou en alusión a Manuel Baltar, ao cal deu grazas pola súa decisión, o seu compromiso, a súa "paixón" por Ourense e a súa herdanza dunha Deputación "saneada economicamente".
![](https://img-g24-crtvg.flumotion.com/prog24/2023/20230717/20230717MenorDiputacion3.png)
Menor agradeceu, ademais, a confianza dos seus compañeiros de partido, tivo palabras para a súa muller e fillos, para os representantes públicos que xa non están na entidade e para os que entran novos, e fixo a súa primeira petición aos grupos da oposición na corporación provincial.
Máis aló das "discrepancias ideolóxicas", demandou capacidade para chegar aos acordos "que nos esixe a sociedade" e contou del mesmo que é unha persoa que escoita, dialoga e cre firmemente no consenso. Adiantou, feito ese apuntamento, que buscará o apoio de todos. "Pídovos a máis absoluta implicación neste proxecto que se chama provincia de Ourense", subliñou.
"Non se trata de inventar; o verdadeiramente importante é acertar á hora de priorizar. Planificar e priorizar serán os meus piares", indicou.
Menor enumerou o que el entende que son fortalezas (sector primario, viticultura, AVE, termalismo) e as debilidades (principalmente a perda de poboación, para combater con infraestruturas e creación de postos de traballo).
"Hoxe comezo un novo reto, pero non me esquezo da outra responsabilidade que asumín como alcalde do Pereiro", remarcou Menor na investidura, que resolveu cun desexo: "Espero non fallar".