Macron, a favor de dar unha autonomía a Córsega dentro de Francia

O presidente de Francia, Emmanuel Macron, mostrouse hoxe favorable a dar "autonomía" a Córsega dentro da República e a recoñecer a "especificidade" histórica e cultural da illa na Constitución cun artigo propio.

Nunha esperada alocución ante a Asemblea lexislativa corsa, dominada polos bloques políticos de corte nacionalista, Macron mencionou un "momento histórico" para superar a "incomprensión" e a "confrontación" que dominou no pasado as relacións entre a illa e o Estado.

"Estou a favor de que se franquee unha nova etapa", dixo, e pediu "construír unha autonomía" para Córsega que non sexa "contra o Estado nin sen o Estado", senón dentro da República francesa.

Para este proceso, cominou aos políticos insulares a traballar nunha proposta constitucional sobre o novo estatuto de Córsega, acordada co Goberno, nun prazo de seis meses. "Non hai liñas vermellas" para esta tarefa, só o ideal da República, que debe ser o "suficientemente forte" para saber acoller mellor as "aspiracións" de Córsega e a súa singularidade, asegurou Macron. "É o voso desexo, eu compártoo e fágoo meu", manifestou.

Os compromisos anunciados son froito dun diálogo que comezara o ano pasado entre o Ministerio de Interior e as autoridades dunha Córsega na que os nacionalistas foron gañando peso electoral ao longo dos anos e na que controlan a Asemblea e o Executivo insular.

Ese proceso seguiu ás tensións contra París, con episodios de violencia nas rúas que viviu a illa tras a morte en prisión en marzo de 2022 do militante Yvan Colonna, un símbolo para os nacionalistas, condenado a cadea perpetua polo asasinato en 1998 do prefecto (delegado do Goberno) Claude Érignac.