Máis de 26.000 persoas opositan esta fin de semana para ingresar na Garda Civil

Un total de 26.332 persoas opositan esta fin de semana en toda España a unha das 2.721 prazas para a escala de cabos e gardas da Garda Civil ofertada este ano. Do total de aspirantes, 8.319 son mulleres, é dicir un 31,6 %.

En canto ao nivel de formación, un total de 5.279 con titulación universitaria, mestrado ou doutoramento. Por rango de idade, a metade dos aspirantes sitúase entre os 20 e os 30 anos, o que deixa a idade media de aspirantes en 28 anos.

A fase de oposición divídese en catro probas: de coñecementos, físicas, entrevista persoal e recoñecemento médico.

Para o exame de coñecementos, a Garda Civil estableceu 19 sedes, situadas en 12 comunidades autónomas diferentes: Alacante, Ávila, Baeza, Baleares, Cádiz, Xixón, Granada, As Palmas, León, Logroño, Madrid, Málaga, Mérida, Murcia, Sevilla, Tenerife, Valencia, Vigo e Zaragoza.

En Galicia preséntanse 1.168 persoas das cales 366 son mulleres e 802 son homes. Por provincias, na Coruña preséntanse 113 mulleres e 278 homes; en Lugo 50 mulleres e 107 homes; en Ourense 53 mulleres e 123 homes e en Pontevedra 150 mulleres e 294 homes.

Fase de concurso

Previamente, levouse a cabo a primeira fase, a de concurso, na que se avaliaron os méritos que cada opositor engade aos requisitos mínimos esixidos para poder participar nestas probas selectivas.

Ter entre 18 e 40 anos, nacionalidade española, carecer de antecedentes penais ou contar como mínimo co título de educación secundaria son algúns dos requisitos necesarios.

A proba practicada este sábado e domingo consiste na realización dunha serie de tests sobre coñecementos teóricos xerais, idiomas, ortografía, psicotécnicos e gramática.

Probas físicas

Os opositores que obteñan puntuación suficiente serán convocados para as probas físicas: un circuíto de coordinación e axilidade, unha proba de resistencia (carreira de dous quilómetros), unha de forza consistente na realización dun número determinado de flexións segundo o sexo e unha proba de natación de 50 metros.

Os que superen estas últimas probas serán sometidos a unha entrevista persoal para avaliar a súa idoneidade psíquica e finalmente un recoñecemento médico para valorar o seu estado de saúde e aptitude física.

Formación profesional

Os aspirantes que culminen o concurso-oposición incorporaranse á Academia de Gardas de Baeza (Xaén) e ao Colexio de Gardas Novos "Duque de Ahumada" de Valdemoro (Madrid), onde recibirán a súa formación profesional durante un curso académico e un ano de prácticas.