Máis dun ano agardando a que Telefónica arranxe un poste partido en Oza-Cesuras
Máis dun ano agardando a que Telefónica arranxe un poste partido en Oza-Cesuras
Os operarios enviados cualificaron o estado do poste de "perigosísimo", segundo a veciña máis prexudicada, pero aí segue batendo co vento desde hai trece meses
Un poste da liña de cables telefónicos de Porzomillos, en Oza Cesuras, partiu nunha treboada en 2023 e así segue tombado coa liña apoiada nas árbores. Hai máis de trece meses a familia da vivenda próxima deu o primeiro aviso a Telefónica do risco existente.
"O perigo para nós é que entramos á casa por aquí e que nos pode caer enriba. O perigo é tamén para viandantes e coches que pasan polo camiño, que é bastante transitado. Porque cando pega o vento contra o peche pode caer para o outro lado", explica Raquel Fraga.
Lembra que mesmo os técnicos recoñeceron que requiría arranxo urxente, tras un dos moitos pedimentos de solución que ten feito ante Telefónica desde 2023.
