Máis de 30 feridos en Tel Aviv tras bater un camión contra unha parada de autobús

Un camión bateu contra unha parada de autobús ao norte deTel Aviv e causou este domingo polo menos 33 feridos, conforme as últimas cifras dos servizos de emerxencia de Israel.

As autoridades sospeitan que se trata dun ataque terrorista xa que o atropelo sucedeu cando os viandantes esperaban preto dunha parada de autobús en Glilot, ao norte de Tel Aviv, informou o servizo de emerxencias Magen David Adom (MDA) e a Policía israelí.

"Unha investigación preliminar mostra que un autobús parou preto da estación para deixar os pasaxeiros en Glilot, e nese momento chegou un camión" e arremeteu contra eles, detallou un comunicado policial, que di que está a investigar o suceso como un posible "ataque terrorista".

Outras fontes cifraron con anterioridade en 40 os feridos.

Os servizos de emerxencias informaran de 16 feridos trasladados a un hospital, seis deles en estado grave. Voluntarios sanitarios do servizo de emerxencias United Hatzalah aseguraban que algunhas persoas seguían atrapadas debaixo do camión cando chegaron a socorrer.

"Algunhas delas foron rescatadas polos equipos de bombeiros en estado grave despois de quedaren atrapadas debaixo do camión. Os membros da unidade de resposta a crises e psicotraumas de United Hatzalah tamén brindaron asistencia no lugar a varias persoas que sufriron conmoción emocional".

Varios civís abateron a tiros o suposto agresor. En 2024, polo menos 34 persoas morreron nun total de vinte ataques perpetrados por palestinos en Israel ou preto de asentamentos ilegais na Cisxordania ocupada. Doce eran uniformados e 22 civís, polo menos nove deles colonos.

O último ataque rexistrouse o 5 de outubro, cando un axente de Policía israelí foi asasinado e catro civís resultaron feridos nun tiroteo preto dun intercambiador entre as cidades israelís de Yavne e Ashdod, segundo o MDA.