Marine Le Pen enfróntase a dez anos de prisión e inhabilitación por malversación de fondos

 A líder da extrema dereita francesa, Marine Le Pen, dixo este luns sentirse moi serena ao comezo do proceso no que a xulgan, xunto a unha trintena de membros do seu partido, por malversación de fondos do Parlamento cando era eurodeputada, e insistiu en que confía na Xustiza e en que é inocente.

"Temos unha chea de argumentos para defender o que creo que é a liberdade parlamentaria, que é o que se discute neste asunto", sinalou Le Pen en declaracións á prensa á entrada do Tribunal Correccional de París, nun xuízo que se se resolve con condena podería supoñer a súa inhabilitación.

Lembrou que ela e o resto dos acusados van ter tempo, durante os dous meses do xuízo, de "demostrar que non se violou ningunha regra, é dicir, ningunha regra política e ningunha regra do regulamento do Parlamento" Europeo.

Insistiu en que afronta "con moita serenidade" este xuízo, no que está acusada de malversación de fondos públicos pola utilización cando era eurodeputada, como os outros procesados, dos seus asistentes parlamentarios pagos con fondos europeos para actividades que tiñan que ver coa actividade do seu partido, entón Fronte Nacional e logo bautizado Agrupación Nacional.

Tamén fixo fincapé en que confía na Xustiza.

Se fose considerada culpable, podería ser condenada ata a dez anos de prisión, un millón de euros de multa e dez anos de inhabilitación, o que lle imposibilitaría presentarse nas próximas presidenciais, programadas para 2027.

Bruno Gollnisch, outro dos que sentan con ela no banco, que tamén foi deputado europeo e dirixente do FN, afirmou que "este asunto non debería chegar nunca á Xustiza" porque co que se lles está botando en cara "poderíanse procesar 500 deputados" europeos.

"A partir do momento en que a Xustiza se ocupa do que fan os asistentes parlamentarios, controla o que fan os deputados, e iso está en contra do principio constitucional da separación de poderes", explicou Gollnisch.

O que foi no FN a man dereita de Jean-Marie Le Pen, o fundador do partido e pai de Marine Le Pen, denunciou que na orixe deste proceso está a acusación lanzada polo que ocupou o posto de presidente do Parlamento Europeo de 2012 a 2017, o socialdemócrata alemán Martin Schulz, e que o fixo por razóns políticas.

Foi Schulz o que denunciou en marzo de 2015 ante a Axencia Europea Antifraudes (OLAF) o uso indebido dos asistentes parlamentarios empregados polo FN, que logo os xuíces instrutores estimaron que supuxo un custo para as arcas do Parlamento Europeo de 6,8 millóns de euros.

Patrick Maisonneuve, que é o avogado da Eurocámara, que se constituíu en acusación particular no xuízo, lembrou pola súa banda que os instrutores concluíron "ao cabo de varios anos de investigación" que o partido de extrema dereita puxera en marcha "un sistema que se xeneralizou" para a utilización indebida dos asistentes parlamentarios.

E que ese "sistema" estaba controlado "polos dirixentes da Fronte Nacional, agora Agrupación Nacional".

Maisonneuve subliñou que "os fondos do Parlamento Europeo non están para financiar os partidos políticos nacionais" e que un asistente parlamentario pode ter unha actividade de militantes pero "fóra das horas de traballo" nas que deben dedicarse "ao deputado ao que está vinculado por contrato".

O xuízo abriuse coa lectura dos diferentes cargos contra os imputados. A presidenta do tribunal, Bénédicte de Perthuis, comunicou que tanto o fundador do partido, Jean-Marie Le Pen, como o exeurodeputado Jean-François Jalkh, que figuran tamén como imputados, foron separados do caso a causa do seu estado de saúde.

Le Pen, de 96 anos, foi examinado por un tribunal médico que determinou que non estaba en condicións de comparecer.