Varios nichos do cemiterio de Viñoás, en Nogueira de Ramuín, levan medio ano ao descuberto pola chuvia

A herba que xa crece sobre os cascallos dá idea do tempo que leva derrubado o cemiterio de Viñoás, en Nogueira de Ramuín. Arredor de medio ano, calculan os veciños, que o único que puideron facer ata o momento foi taparen a boca dos nichos para ocultar o que a chuvia deixou ao descuberto.

"Houbo que tapar para que non se vira nada de nada, porque a xente vai á misa e, ti imaxínate, unha cativa que diga 'mira, papá, o que atopei", indica un veciño da zona.

O cemiterio está situado nunha ladeira cunha grande inclinación, en plena Ribeira Sacra ourensá. Foi ese desnivel do terreo, combinado coas abundantes chuvias que caeron este inverno, o que provocou o derrubamento. Hai varios nichos afectados, dos máis antigos do lugar.

"Poucos, pero os que levou, levounos tal cal, coma un tsunami, dez ou doce", engade o veciño.

A dificultade para identificar todos os propietarios e que se fagan cargo dos restos é o que está complicando os labores de reparación, que deben estar supervisados por Patrimonio.

"Non é por falta de interese nin por parte do párroco nin do bispado. Está dando un tempo prudencial para que a xente reclame os restos dos seus antepasados", explica outra veciña.

Mentres tanto, os usuarios da igrexa parroquial, á que pertencen un cento de veciños da contorna, deben convivir con esta estampa que, ademais, obstaculiza o movemento polo cemiterio e o acceso a outras tumbas.