Milleiros de persoas lembran a Isabel II con flores

Amence en Londres e os operarios de Buckingham Palace retiran a maior parte das flores para permitir que a xente siga depositando no lugar máis ramos e recordos á raíña falecida. A tradicional contención británica á hora de mostrar as súas emocións en público rompe ao falar de Isabel II, incluso entre a xente nova.

"Sabes?, a Raíña foi unha figura realmente importante nas nosas vidas, sempre estivo aí para todos. E un sente, non quero emocionarme, pero... xa sabes... é un momento realmente triste na vida de todos, especialmente na Gran Bretaña, pero eu creo que tamén en todo o mundo", di Georgina Suttle, unha moza de 29 anos, profesora nunha escola de Londres.

A xente segue lembrando a Isabel II

Co novo rei, Carlos III, xa proclamado oficialmente, a xente segue chegando nunha peregrinación interminable aos arredores de Buckingham Palace e doutros edificios e lugares simbólicos para a coroa británica, nunha lembranza chea de emoción e silencio.

"É un momento conmovedor na historia do noso país, e só queremos mostrar o noso respecto á raíña defunta e tamén ao novo rei", afirma Ian Bilboe, un xerente comercial establecido en Londres.

Coas bandeiras a media hasta presidindo o loito decretado en todo o país, a sensación entre a maioría dos habitantes do Reino Unido, monárquicos ou non, é que a morte de Isabel II marca a fin dunha era na historia do país.