Milleiros de afectados pola suspensión do servizo de AVE co Levante por unha avaría

Os pasaxeiros do AVE Ourense-Alacante que saíu ás catro e media da estación ourensá aseguran que non recibiron información ningunha da avaría na liña de alta velocidade en Cuenca pola que o servizo ao Levante se suspendeu o venres nos dous sentidos. Van ter que durmir en Madrid e seguir viaxe mañá se o tráfico queda restablecido como agarda José Estrada, director xeral de Circulación de ADIF.

Coma eles, miles de pasaxeiros das tres compañías que operan alta velocidade en España, Renfe, Iryo e Ouigo, nas liñas que unen Madrid coa Comunidade Valenciana e Murcia, víronse afectados pola avaría en Monteagudo de las Salinas. Láianse dos prexuízos en plenas vacacións como perda de voos e de días pero, sobre todo, quéixanse da falta de información e de alternativas ao servizo.

Mediante mensaxes de texto, Renfe informou aos usuarios da posibilidade de cambiar o billete para outro día sen custe. Aínda así, unha vez cheguen a destino, a maioría anunciou a súa intención de denunciar.