Renfe recuperará o 17 de decembro a conexión Lugo-Madrid sen transbordos por estrada

Renfe recuperará a partir do 17 de decembro o tren Alvia entre Lugo-Madrid sen transbordos por estrada, unha vez Adif finalizou as obras de renovación da infraestrutura entre Ourense e Monforte de Lemos.

A compañía precisa nun comunicado que “ata ese momento” a compañía seguirá prestando “este servizo por estrada entre Ourense e Lugo para facilitar a mobilidade dos viaxeiros”, mentres “o persoal de condución habilítase para poder circular por esta vía renovada, tal e como esixe o regulamento de seguridade”.

A compañía vai restablecer os diferentes servizos sen transbordos neste tramo "dunha forma progresiva, atendendo á necesaria habilitación do persoal de condución, que a pasada semana empezou a formación para habilitarse e poder circular pola renovada infraestrutura", precisa.

Ademais, tamén informa de que o 25 de novembro "os trens Alvia transversais Barcelona–A Coruña recuperarán o servizo habitual sen transbordos".

Desde o 15 de decembro "volverán circular sen plan alternativo por estrada a Media Distancia A Coruña-Ourense, Vigo-Ourense-Ponferrada, Ourense-Ponferrada e Ourense- Lugo", engade.

Precisamente, tras estas modificacións do servizo, Renfe abre a venda de billetes "en todas as súas canles" para viaxar nos trens do corredor Galicia-Madrid máis aló do 15 de decembro e ata o 23 de xaneiro de 2025.

A nova ampliación da oferta de billetes pretende, segundo Renfe, facilitar aos clientes programar as viaxes previstas para o período do Nadal. 

A compañía porá en circulación a partir do 15 de decembro dous servizos de Avlo na conexión A Coruña-Madrid, con 4.000 prazas semanais máis

Renfe mellorará a oferta de trens entre Galicia e Madrid a partir do 15 de decembro coa modificación do servizo ao poñer en circulación outros dous servizos Avlo na conexión A Coruña-Madrid (ida e volta), con trens novos da serie S106, que virán substituír dous dos anteriores servizos Alvia.

Desta forma, as 22 circulacións diarias ofertadas (ida e volta) entre Galicia e Madrid pasaranse a prestar con dez trens S106 (seis servizos AVE e catro servizos Avlo), catro AVE S112, e oito Alvia.

A compañía aumentará desde o 15 de decembro a oferta total de prazas no corredor Galicia-Madrid cunhas 4.000 extra á semana, ao ampliar a capacidade de butacas co cambio dos tradicionais trens Alvia aos novos Avlo, prestados cos S106 de rodadura desprazable, e que contan con máis de 500 asentos.

En total, a oferta semanal no corredor Madrid-Galicia pasará a ser de máis de 58.000 prazas, ao sumarse ás ofrecidas na actualidade as prazas extra destes dous novos servizos Avlo da Coruña e as postas en servizo o pasado día 5 de novembro no traxecto Vigo-Madrid, onde se substituíu tamén material Alvia por AVE S106. Deste xeito, Renfe destacou que Galicia suma máis trens S106 á súa oferta con Madrid.

Ademais, apuntou que se producirá unha importante mellora nos tempos de viaxe con respecto ao Alvia, e recortaranse ata en 18 minutos no caso do Avlo A Coruña-Madrid, e en 42 minutos no Avlo Madrid-A Coruña.

En concreto, estes novos servizos substituirán ao Alvia que une o roteiro entre Madrid e Ferrol con saída da capital ás 8:08 horas e chegada á Coruña aás 11:45 horas, con paradas en Zamora, Ourense e Santiago, así como ao Alvia Ferrol-Madrid, que sairá da Coruña ás 16:16 horas (antes ás 16:26 horas) e chegada a Madrid Chamartín ás 19:50 horas, con paradas en Santiago, Ourense e Zamora.

Outras modificacións na oferta comercial 

Desde o 15 de decembro produciranse outras modificacións no servizo. A conexión Ferrol-Madrid aumentará as opcións de viaxe enlazando o novo Avlo A Coruña-Madrid e a actual AVE, ambos con material S106, o que permitirá ter tempos de viaxe de ao redor das 5 horas, e supoñerá que Ferrol poida gozar dos prezos baixo custo dos Avlo e do novo material S106.

Tamén se producirá desde esta data unha modificación na conexión entre Madrid e Vigo. O tren Alvia 4275, que actualmente parte de Madrid ás 8:00h, recupera o seu horario de saída previo ao comezo das obras de Chamartín e adiántase ás 6:15 horas para ter a súa chegada a Vigo Urzáiz ás 10:55 horas.