Mitsotakis promete tras a súa vitoria unha Grecia "máis próspera e xusta"
Mitsotakis promete tras a súa vitoria unha Grecia "máis próspera e xusta"
Nova Democracia de Mitsotakis obtivo o 40,5 % das papeletas e suma 158 dos 300 escanos do Parlamento grego
O aumento dos salarios, o fortalecemento da sanidade pública e modernizar o Estado, primeiras promesas de goberno
![Dimitris Kapnatais / SOOC](https://img-g24-crtvg.flumotion.com/prog24/2023/20230626/20230626mitsotakis2.png)
O líder conservador Kyriakos Mitsotakis, que logrou a maioría absoluta nas eleccións celebradas onte en Grecia, prometeu que o seu Goberno realizará as "grandes reformas" necesarias para converter a Grecia nun país "máis próspero e xusto".
Tras o escrutinio do 90 % dos votos, a conservadora Nova Democracia de Mitsotakis obtivo o 40,5 % das papeletas, polo que, de momento, suma 158 dos 300 escanos do Parlamento grego.
Mitsotakis será reelixido primeiro ministro de Grecia e poderá gobernar novamente en solitario, como xa fixo durante os últimos catro anos.
"Os cidadáns déronnos un forte mandato para avanzar máis rápido no camiño dos grandes cambios", sinalou tras a súa abafadora vitoria o líder conservador fronte á sede de ND en Atenas.
O resultado foi un novo pau para a oposición de esquerdas de Syriza e especialmente para o seu líder, o ex-xefe de Goberno Alexis Tsipras, que suma só o 17,8 % dos votos e obten 47 representantes, por baixo mesmo dos resultados dos comicios de hai un mes.
"Hoxe péchase definitivamente un ciclo traumático de mentiras e toxicidade que freaba a Grecia", engadiu Mitsotakis en alusión ao declive de Syriza.
![](https://img-g24-crtvg.flumotion.com/prog24/2023/20230626/20230626Tsipras.png)
A chave, a xestión económica
O apoio a Mitsotakis nestas eleccións débese, principalmente, á súa xestión económica, segundo todos os estudos.
A pesar de que a economía do país aínda non alcanzou os niveis previos á crise da débeda de 2010, os gregos recoñecen as subidas de pensións e salarios, a chegada de investimentos e que o país teña un crecemento superior á media da Unión Europea.
Mitsotakis sinalou que "será o primeiro ministro de todos os gregos" e que os principais obxectivos do seu Goberno serán o aumento dos salarios, o fortalecemento da sanidade pública e modernizar un Estado que nalgúns sectores mostras claras deficiencias.
Esta é a primeira vez desde o estalido da crise financeira en 2010 que un primeiro ministro grego logra ser reelixido tras un mandato de catro anos.