Mobilización en 350 cidades do mundo para reclamar as actas electorais de Venezuela
Mobilización en 350 cidades do mundo para reclamar as actas electorais de Venezuela
Decenas de miles de persoas protestaron esta fin de semana contra o que consideran unha fraude electoral
En Galicia celebráronse manifestacións en Vigo, A Coruña e Santiago, con protagonismo para os venezolanos da diáspora
A protesta dos venezolanos que reclaman transparencia nos resultados electorais cobrou forma en 350 cidades, con especial incidencia nas áreas latinoamericana e europea. En Madrid foron 15.000 os participantes na manifestación deste sábado na Porta do Sol, segundo a Delegación do Goberno. O apoio do PP foi evidente neste acto, con Isabel Díaz Ayuso cargando contra Maduro:
"Esiximos a súa dimisión decontado. Nin un día máis pode seguir á fronte e que o Tribunal penal Internacional actúe".
A protesta madrileña prolongouse ata a noite e outro dos protagonistas foi o político exiliado Leopoldo López, que falou dunha fraude electoral que non se pode soster internacionalmente.
En Galicia, as manifestacións de Vigo, A Coruña e Santiago congregaron centos de venezolanos. Hai que ter conta que xa viven preto de 19.000 na nosa comunidade. Estas imaxes corresponden á cidade olívica, onde resoaron os pedimentos de liberdade.
"Quen somos? Venezuela. Que queremos? Liberdade", barraban ao unísono os congregados.
As bandeiras, gorras e outros distintivos de Venezuela tamén se puideron ver onte ao serán na praza Roxa de Compostela, onde se escoitaron berros a prol dun cambio político.
"Xa caeu. Este goberno xa caeu", coreaban os manifestantes.
E mentres continúan as protestas, segue o éxodo de venezolanos cara a Galicia: chegan 18 cada día de media.
.png)
