Moncho Fernández: “O 80 por cento do partido vai estar no ritmo do encontro e o rebote”

Moncho Fernández, adestrador do Monbus Obradoiro, sinalou este venres que o Baxi Manresa é “un martelo” que esixirá a mellor versión do seu equipo para sumar un triunfo vital na súa carreira cara á permanencia.

“É un martelo porque manteñen ese ritmo desde o minuto un ao corenta. Xogan moi rápido tras rebote, tras canastra, pero é que ademais rebotean moi ben no aro contrario. Aí vai ser unha batalla durante todo o tempo”, comentou en conferencia de prensa.

O técnico santiagués apuntou que o seu equipo deberá “estar á altura” en dous aspectos do xogo como son “o ritmo do partido e o rebote” para dobregar a un rival que é “letal” nas transicións.

“É o equipo da liga que xoga a máis posesións, son os máis rápidos e os que máis anotan. Por iso hai que controlar o ritmo. E logo está o rebote ofensivo, que tamén aí son os mellores da liga. Se non somos capaces de estar a altura neses dous aspectos do xogo, non teremos nada que facer”, avisou.

Neste sentido, Moncho Fernández lembrou que tamén será “moi importante” o acerto dos seus xogadores porque iso axudará a que o ritmo do Manresa “non sexa tan alto”.

“O 80 por cento do partido vai estar neses aspectos”, incidiu o preparador do Obradoiro.

Para o técnico galego o seu rival ten o selo de Pedro Martínez:

“Hai anos que lle vai francamente ben e outros, non tanto, pero a filosofía non a cambian. E os seus resultados están aí”.

Mentres, o internacional letón Janis Timma, é dúbida para o partido deste sábado por mor dunha lumbalxia que lle impediu adestrar co equipo durante a semana.