Montero limita ao IRPF a cesión de impostos a Cataluña

A ministra de Facenda evitou, ata o momento, explicar o alcance real do acordo asinado con Esquerra para a cesión dos impostos a Cataluña.

Pero este venres si lle puxo límites ao pacto: cínguese ao imposto da renda, o IRPF, e do resto de tributos xa se falará "de forma paulatina, ao longo dos anos, ao longo do tempo" porque "a vocación consiste en recadar a gran parte dos impostos que se pagan en Cataluña".

María Jesús Montero insistiu en que o pacto só recolle a transferencia do IRPF "e todo o que non aparece no acordo non está nin pactado nin decidido".

Nova cita de Sánchez con presidentes autonómicos

O financiamento autonómico tamén foi tema de conversa na Moncloa. Pedro Sánchez retomou a rolda de encontros cos presidentes autonómicos. Os do PP, a de Cantabria e o da Rioxa volveron pedirlle este venres que desfaga o pacto con Esquerra.

A presidenta de Cantabria, María José Sáenz de Buruaga, asegurou que marchaba "preocupada" porque ve que "as decisións cruciais para España se toman máis en Suíza ou nunha mesa con ERC que na sede deste Goberno".

Sáenz de Buruaga di que non conseguiu ningún compromiso concreto de Sánchez, aínda que si lle confirmou que a Conferencia de Presidentes Autonómicos se celebrará, precisamente, en Cantabria a principios de decembro. Na orde do día non está o financiamento das comunidades, aínda que os gobernantes do PP tentarán forzar a súa inclusión no debate.