Morre Constantino II, o derradeiro rei de Grecia e irmán da raíña Sofía

O exrei de Grecia Constantino II, irmán da raíña Sofía, faleceu este martes aos 82 anos no hospital privado Ygeia de Atenas, onde fora hospitalizado a semana pasada.

Xunto ao exmonarca atopábase desde hai días toda a súa familia, incluídas as súas irmás dona Sofía e dona Irene, quen acudira desde España para estar xunto a el nos seus últimos momentos de vida.

Constantino II levaba varios anos cunha saúde fráxil. En decembro de 2021 fora hospitalizado tras sufrir unha crise isquémica e novamente un mes despois por contraer o coronavirus.

Aínda que nos últimos días apenas transcendera información sobre o seu estado, os medios gregos sinalaron que sufrira un novo derramo cerebral, polo que foi trasladado á unidade de coidados intensivos.

A súa oficina non quixo confirmar en ningún momento este extremo e limitouse a sinalar ata onte que se atopaba estable dentro do seu estado fráxil.

Constantino levaba tempo con problemas respiratorios e cardíacos, e nos últimos anos a súa mobilidade estaba reducida.

Constantino II foi coroado rei de Grecia en 1964, aos 24 anos, aínda que pouco despois da instauración da ditadura dos Coroneis no país, en 1967, se viu obrigado a exiliarse con toda a súa familia en Roma.

En 1974, tras a caída da xunta militar, celebrouse un referendo no país, no que o 69,2 % da poboación optou pola república, o cal converteu a Constantino no derradeiro rei que tivo Grecia.