Morre un mozo en Granada ao caer dun patinete eléctrico capaz de chegar aos 120 km/h
Morre un mozo en Granada ao caer dun patinete eléctrico capaz de chegar aos 120 km/h
O falecido non levaba casco, que non é obrigatorio
![](https://img-g24-crtvg.flumotion.com/prog24/2023/20230901/mortopatinetegranada.jpg)
Un mozo faleceu tras sufrir un accidente en Granada cando circulaba cun patinete eléctrico equipado cun dobre motor, capaz de alcanzar os 120 quilómetros por hora. Segundo informou a Policía Local de Granada, a vítima, que ía sen casco, perdeu o control do patinete eléctrico e sufriu unha caída. Foi evacuado en estado grave ao hospital Virxe das Neves de Granada polas lesións producidas no accidente. Faleceu 24 horas despois do sinistro.
O patinete quedou a disposición da Policía Local, que vai comprobar a súa limitación de velocidade xa que conta con dous motores de 3500 w e a súa ficha técnica indica que pode alcanzar os 120 quilómetros por hora.
Tras coñecer este accidente, a Asociación de Mobilidade Ecolóxica e Patinetes Eléctricos de Granada trasladou o seu pésame a familiares e achegados da vítima e apuntou que o accidente se produciu nunha rúa pouco transitada cando a vítima perdeu o control nunha curva.
Insistiu na importancia de utilizar elementos de seguridade como o casco, aínda que non sexan obrigatorios, e elementos para gañar visibilidade, como os chalecos reflectores.
A asociación subliñou que os patinetes eléctricos, como un vehículo máis, conlevan riscos e apuntou que un impacto a 25 quilómetros por hora, a velocidade máxima permitida, aseméllase a caer de cabeza desde unha altura de tres metros.