Musk afirma que deixará Twitter cando atope "alguén tan parvo" que o substitúa

O multimillonario Elon Musk anunciou este martes a súa decisión de renunciar como director executivo de Twitter despois de que o luns perdese unha enquisa na plataforma na que preguntaba aos usuarios se debía dimitir do cargo. "Renunciarei como CEO (director executivo) tan pronto como atope a alguén o suficientemente parvo como para aceptar o posto", aseverou Musk en resposta á sondaxe realizada na rede social que se saldou cun 57,5 % de votos a favor de que abandone o cargo.

I will resign as CEO as soon as I find someone foolish enough to take the job! After that, I will just run the software & servers teams.

— Elon Musk (@elonmusk) December 21, 2022

Sostivo que unha vez atope a unha persoa que o suceda, tan só dirixirá os equipos de software así como os servidores. A enquisa publicada polo magnate o luns tiña unicamente dúas opcións, polo que á parte do 57,5 % que votou a favor de que abandone o cargo, outro 42,5 % mostrouse en contra da súa saída como conselleiro delegado da empresa.

No chío da consulta, Musk subliñou que acataría os resultados que saísen dela. A dimisión de Musk como director executivo de Twitter dáse case dous meses despois de que se oficializara o acordo de compra da compañía por 44.000 millóns de dólares (41.000 millóns de euros).