Na carreira polo futuro da eólica mariña flotante Galicia ten unha posición de privilexio

Para o sector da eólica mariña é unha oportunidade de crecemento que esixe sumar esforzos. Defenden que é compatible con outras actividades como a pesca e propoñen medidas compensatorias a través da fiscalidade ou o apoio aos colectivos afectados.

"A fiscalidade ben desenvolta e ben deseñada e cun diálogo previo pode ser unha ferramenta para compensar ás comunidades locais costeiras, ás confrarías, aos contornos de pesca, e para poder proporcionarlles uns ingresos adicionais", explica Juan Virgilio Márquez López, director xeral da Asociación Empresarial Eólica. 

Confían en avanzar no marco regulatorio e pídenlle ao Goberno celeridade para que a finais de ano poida realizarse a poxa dos espazos marítimos para poder presentar os proxectos. Na carreira pola eólica mariña, o sector considera que Galicia está ben posicionada.  

"O estaleiro de Navantia de Fene é o que construíu a día de hoxe once dos trece flotadores que hai no mercado de eólica mariña. Isto colócanos nunha posición de privilexio, agora mesmo estamos facendo transferencia de tecnoloxías a moitas empresas en moitos lugares. O que é importante é que isto se consolide", apunta Abel Méndez, director comercial e de negocio de Navantia Seanergies.

O comité executivo de Navalia celebrou en Vigo un encontro empresarial centrado na eólica mariña previo á feira que se celebrará en maio. Os empresarios puxeron o foco na creación de emprego, 7.500 postos ata 2030 e na súa aceptación social como unha enerxía limpa para loitar contra o cambio climático.