Nacho Cano desvincúlase das presuntas irregularidades de contratación no musical 'Malinche'

O produtor musical Nacho Cano afirmou este luns que non coñecía os detalles sobre a contratación de bolseiros para o musical Malinche, xa que el dirixe a parte artística e eses asuntos atinxen a outras persoas do seu equipo.

As declaracións de Nacho Cano desenvolvéronse durante case dúas horas en presenza da titular do Xulgado de Instrución número 19 de Madrid, quen investiga o produtor por presuntos delitos contra os dereitos dos traballadores e dos cidadáns estranxeiros, en relación coa contratación e as condicións laborais de 17 bolseiros mexicanos para traballar no musical.

O artista contestou á xuíza, á fiscal e aos seus letrados, respondendo en varias ocasións que el non sabía determinadas cuestións porque a súa responsabilidade era artística mentres que a contratación correspondía a outros integrantes do equipo. 

Segundo sinalaron os presentes, algunhas desas declaracións foron bastante tensas, xa que Cano afirmou con certa prepotencia que "puido estar mal asesorado", ademais de verter críticas contra a Policía e o Goberno.

Sobre o mediodía chegou aos xulgados Lesly Guadalupe Ochoa, a bolseira que denunciou a Cano. Afirmou que lle gustaría ver o produtor e que lle “mentise á cara”. Ademais, opinou que Cano “non tivo ética profesional” ao traer os mozos “de maneira ilegal”.

Ochoa insistiu en que vén para estar “informada do que está a pasar” e, posteriormente, accedeu ao interior dos xulgados e subiu á planta en que está o Xulgado de Instrución número 19. Así e todo, non se atopou co produtor musical.

Tras o primeiro receso e a declaración de Nacho Cano, chega a quenda de Susana Jové, unha das directivas do musical.