Nervión Naval fabricará en Galicia velas ríxidas para grandes buques de toda Europa

O cargueiro que acaba de arrimar en punta Lagosteira, en Arteixo, ten 229 metros de eslora e só en Marín liberou 19.000 toneladas de carga de cereal e legume procedente do Brasil. Pero polo que o Pyxis Ocean é único no mundo e polo seu sistema de propulsión. A súa tecnoloxía eólica permite aforrar un 30 % en combustibles fósiles. E esas velas, un prototipo dunha empresa británica, vanse construír nas Somozas.

"Teñen unha parte metálica e outra que é de fibra. Velas ríxidas, windwings, que se chaman, e asinamos un contrato con Bar Technologies, a empresa matriz, para facernos cos dereitos de fabricación, subministración e comercialización en toda Europa", informou Diego Méndez, o director de operacións do Grupo Amper-Nervion Naval Offshore.

As velas poden xirarse 360 graos para adaptalas ao vento e 90 graos ocultalas baixo a cuberta e facilitar a descarga. A conselleira de Industria declarou que se trata dunha tecnoloxía innovadora que avanza nos obxectivos da descarbonización.

"Pero tamén desde o punto de vista da industrialización e do emprego que pode supoñer para Galicia, esta tecnoloxía é punteira. É o primeiro cargueiro que funciona con esta tecnoloxía punteira e que aforra un 30 % de combustibles fósiles", engadiu María Jesús Lorenzana, a Conselleira de Economía e Industria.

O Grupo Nervión está agora na fase de adaptar as súas instalacións nas Somozas para a fabricación destas velas, e de pechar contratos coas navieiras e con estaleiros de toda Europa para realizar a montaxe en destino.