Netanyahu di que Israel non pode aceptar a fin da guerra como condición da tregua

O primeiro ministro de Israel, Benjamin Netanyahu, dixo este domingo que o seu país "non pode aceptar" a fin da guerra en Gaza como condición para un cesamento do fogo que permita liberar os reféns israelís no enclave palestino.

"Non estamos dispostos a aceptar unha situación na que os batallóns de Hamas saen dos seus refuxios, volven tomar o control de Gaza, reconstrúen a súa infraestrutura militar e volven ameazar a cidadanía de Israel nas comunidades adxacentes", dixo o mandatario israelí nunha mensaxe.

As súas palabras prodúcense en pleno impulso negociador no Cairo para lograr un acordo de tregua entre Israel e Hamas en Gaza, onde xa morreron máis de 34.600 persoas, a maioría mulleres e menores.

Netanyahu referiuse ás informacións que apuntan a que o grupo palestino puxo como condición ineludible dun posible acordo o fin definitivo das hostilidades.

"Hamas permaneceu atrincheirado nas súas posicións extremas, en particular a demanda de retirar a todas as nosas forzas da Franxa, terminar coa guerra e deixar intacto a Hamas", asegurou nun vídeo.

O primeiro ministro israelí deixou claro que non aceptará as demandas do grupo palestino, e que seguirá loitando ata lograr todos os seus obxectivos na guerra.

Tamén defendeu que Israel se amosou extremadamente flexible nas súas propostas, e mandoulle unha mensaxe ás familias dos reféns, que levan semanas manifestándose para pedir un acordo de tregua que permita a súa liberación.

"Hamas é quen está impedindo a liberación dos secuestrados. Facemos todo o posible por liberar aos secuestrados", asegurou.

Fontes palestinas indicaron a EFE que o líder do grupo islamiza en Gaza, Yahya Sinwar, "quere un compromiso estadounidense por escrito para o fin incondicional dos combates" e solicita que Israel non impida o regreso á Cisxordania ocupada dos palestinos liberados.

Indicou tamén que o movemento non entrega a súa resposta por ter pendentes algunhas "aclaracións", pero recoñeceu que a iniciativa é "mellor que o que se propuxo nas roldas anteriores" de negociación. 

Peche da emisión de Al Yazira

O Goberno israelí decidiu este domingo por unanimidade pechar a emisión da canle qatarí Al Yazira en Israel, despois de que o Parlamento aprobara o mes pasado unha lei que permite o peche de medios estranxeiros.

"O Goberno que encabezo decidiu de forma unánime: a canle de incitación Al Yazira pecharase en Israel", escribiu na súa conta de X Benjamín Netanyahu, sen dar máis detalles sobre cando terá efecto a decisión.

Na súa mensaxe, deulle as grazas ao ministro de Comunicación israelí, Shlomo Karhi, que impulsou a norma que permite clausurar a emisión nacional da cadea qatarí, unha das principais fontes de información sobre a guerra en Gaza, cunha gran despregadura de xornalistas.

A coñecida como Lei Al Yazira outórgalle ao ministro de Comunicación o poder de ordenarlles aos provedores de contidos, por un prazo renovable de 45 días, a fin da súa retransmisión desde o país, ademais do peche de oficinas, a confiscación de equipos e o bloqueo do servidor da páxina web.

Conseguir información de primeira man sobre o que está a suceder na Franxa de Gaza resulta difícil, xa que Israel impide a entrada da prensa internacional ao devastado enclave palestino.