Nobel de Medicina para Svante Pääbo, investigador sueco de especies extintas

O investigador sueco Svante Pääbo foi distinguido co premio Nobel de Medicina e Fisioloxía 2022, segundo anunciou o Instituto Karolinska de Suecia, polos seus descubrimentos sobre "os xenomas de homínidos extintos e a evolución humana".    

Pääbo estableceu "unha disciplina científica completamente nova, a paleoxenómica. Ao revelar as diferenzas xenéticas que distinguen a todos os humanos vivos dos homínidos extintos, os seus descubrimentos proporcionan a base para explorar o que nos fai unicamente humanos", segundo destaca o Instituto sueco

O galardoado "descubriu que se produciu unha transferencia de xenes destes homínidos agora extintos ao Homo sapiens. Este antigo fluxo de xenes para os humanos actuais ten relevancia fisiolóxica hoxe en día, por exemplo, afectando a forma en que o noso sistema inmunolóxico reacciona ás infeccións".

Ademais, o Instituto Karolinska destacou que "logrou algo aparentemente imposible: secuenciar o xenoma do neandertal, un parente extinto dos humanos actuais".

"Tamén fixo o sensacional descubrimento dun homínido extinto, o denisovano, completamente a partir de datos do xenoma recuperados dunha mostra de óso do dedo maimiño", explicou o Karolinska.

O ano pasado o premio foi para os investigadores David Julius e Ardem Patapoutian, os descubridores dos receptores celulares que os humanos usan para sentir a temperatura e o tacto.

O de Medicina é o primeiro da rolda destes prestixiosos premios, aos que seguirán os anuncios en días sucesivos dos de Física, Química, Literatura, da Paz e finalmente o de Economía, o vindeiro luns.

Os Nobel están dotados con 10 millóns de coroas suecas (900.000 dólares) por categoría. Os premios entregaranse no aniversario da morte de Nobel o 10 de decembro.