Nova folga este martes no ensino galego, pero cos centros abertos
Nova folga este martes no ensino galego, pero cos centros abertos
Os colexios terán que abrir no seu horario habitual coa presenza do responsable
A CIG critica os servizos mínimos establecidos por Educación
O Diario Oficial de Galicia (DOG) publicou este luns os servizos mínimos para a segunda xornada de folga na educación pública galega, que se celebrará este martes 28 de novembro, convocada pola CIG, CSIF e STEG contra o acordo de baixada de cocientes e horario lectivo pactado entre a Xunta e os sindicatos CCOO, ANPE e UXT.
A orde que publica a Consellería de Cultura e Educación incide na necesidade de que as dotacións mínimas garantan o "servizo esencial da educación", entendido tanto pola "actividade docente" como pola "vixilancia e coidado" dos menores.
A Xunta establece que os centros de ensino sigan abertos no seu horario habitual, coa necesaria presenza do director ou, no seu caso, doutro membro da dirección que o substitúa. Naqueles colexios de menos de seis unidades, o responsable pode ser substituído por outra persoa que forme parte do equipo docente.
A CIG critica os servizos mínimos
Esta segunda xornada de folga, tras a primeira celebrada o 24 de outubro, foi convocada primeiramente pola CIG-Ensino, principal sindicato da educación pública galega, e posteriormente sumáronse CSIF e STEG e a CUT. A CIG considera que os servizos mínimos anunciados pola Xunta, "aínda sendo aceptables, dificultan que o profesorado das (escolas) unitarias exerzan o seu dereito á folga con normalidade", ao verse obrigado a garantir a apertura das instalacións.
A folga secúndase para rexeitar o acordo asinado o pasado 11 de outubro entre a Xunta e tres das catro organizacións da mesa sectorial (CCOO, ANPE e UXT), cuxo principal punto inclúe a redución de cocientes a 20 alumnos por aula de forma paulatina desde cuarto de Infantil (3 anos) a partir do curso 2024/25. Este proceso culminará no ano 2032/33 coa súa implantación en sexto de primaria. Posponse a unha próxima negociación a mesma medida en ESO, Bacharelato e Formación Profesional.
En canto ao horario lectivo, o acordo reducirá de 25 a 23 as horas de clase á semana a partir do próximo curso en infantil e primaria, aínda que seguen sen ser inferiores ás que había antes de 2011.
