A liña que une Ourense e A Coruña causa novos atrasos nos trens en Galicia

Na mañá deste martes os servizos ferroviarios galegos sufriron novos atrasos nos primeiros trens en circulación. O causante desta situación foi o convoi Ourense-A Coruña, que tiña que chegar á estación final ás 7:53; con todo, o tren acumulou unha hora de demora respecto á súa hora de chegada prevista.

Como consecuencia viuse afectado o tren con saída ás 8:00 desde A Coruña con destino Vigo. Esta liña, con parada en Santiago, Vilagarcía de Arousa e Pontevedra, reprogramou a súa saída ás nove, segundo explicaron na estación coruñesa aos usuarios do servizo.

Ademais, sobre o tren que tiña prevista a súa saída da estación coruñesa ás 9 horas, con destino a Vigo, tamén se anunciou unha demora de aproximadamente dez minutos, por unha incidencia operativa.

Bruno Schenoni, voceiro CXT Pontevedra explica que "faltan trens, falta persoal en todos os colectivos, sobre todo en talleres, que é onde máis afecta ao servizo neste caso. Cos abonos houbo un aumento moi significativo de viaxeiros e o que se reclama é que se adapten os horarios e paradas nas estacións a este aumento".

Desde o Goberno galego tamén urxen unha solución a estes problemas. A conselleira de Infraestruturas e Mobilidade, Ethel Vázquez, di que os trens son "obsoletos", denunciando a falta de persoal e de velocidade pola ausencia dos trens Avril.

Os afectados lamentaron de novos estes atrasos, que se suman aos vividos nas últimas xornadas. Algúns usuarios abandonaron a estación en busca doutras alternativas, renunciando incluso á súa viaxe deste martes.