O Arenteiro cae en León cun gol no 89 e suma seis xornadas sen gañar

O Arenteiro sumou no Reino de León a sexta xornada consecutiva sen gañar, e cae por debaixo da décima praza, situación que non ocupaba desde a xornada 5.

Comezou dominando o líder, pero timidamente, sen crear accións de perigo máis aló dun balón á área e dun remate lonxano que marchou moi desviado. O Arenteiro agardaba a súa ocasión para crear perigo á contra. Co paso dos minutos, a Cultural comezou a concretar as súas ocasións, nas botas dos seus moitos futbolistas galegos. Primeiro, Manu Justo topou con Adri López. Despois, Bicho remataba alto.

O primeiro achegamento galego foi nunha falta botada por David Ferreiro, na que Bañuz non estivo atinado e concedeu un córner. Rematou a primeira parte sen goles, e o Arenteiro si que tivo a súa aos catro minutos da continuación, cunha boa combinación entre Enol e Baselga que o máximo goleador rematou, sacando Bañuz a córner. E, despois, avisaba outra vez David Ferreiro desde a frontal.

Parecía que estaba mellor o Arenteiro neses minutos, pero a Cultural tivo unha moi clara á contra, logo dunha perda no centro do campo. Manu Justo rematou desviado. Co paso dos minutos, o líder foi metendo no seu campo ao equipo galego, que xa non se estiraba tanto. No minuto 89 ía chegar o gol do partido. Foi logo dun saque de falta, que Satrústegui rematou inapelable ao fondo da rede. Un castigo cruel para o Arenteiro, que acumula seis xornadas sen galar e métese na segunda metade da táboa a catro puntos do descenso. O líder rencóntrase co triunfo seis partidos despois e reforza a súa posición.