O Baxi Ferrol amosa a súa mellor versión para soñar coa permanencia

O Baxi Ferrol gañou con contundencia a un equipo da zona alta como Casademont Zaragoza (74-49) e chegou ás seis vitorias meténdose de cheo no grupo de equipos que tenta escapar dos postos de descenso. 

Pode que espoleadas pola lesión de Villegas as xogadoras de Lino López estiveron moi intensas desde o inicio. No primeiro cuarto impuxéronse as defensas (14-14) pero no segundo comezaron a rachar o partido e fóronse ao descanso preto dos dez de vantaxe (33-24). 

A tolemia chegou no terceiro cuarto. O Baxi fixo un parcial de 19-2 esnaquizando o seu rival en defensa e en ataque. O último cuarto encarárono cunha gran comodidade (54-29) o que lle permitiu dosificar esforzos para vindeiras citas. 

Koenen chegou ata os 17 puntos, ben secundada por Ivanovic e Allen que fixeron 14.