O BCE baixa ao 2,5 % o seu tipo oficial, tras recortalo por quinta vez consecutiva

O Banco Central Europeo (BCE) decidiu este xoves baixar o seu tipo de xuro nun cuarto de punto porque a inflación está a baixar na zona do euro e a política monetaria é "menos restritiva".

Tras a reunión do Consello de Goberno, o BCE informou de que reduciu a súa taxa de depósito, á que remunera o exceso de reservas a un día e reflicte mellor os tipos nos mercados, ata o 2,5 %.

Tamén baixou en 25 puntos básicos a súa taxa de interese principal, á que presta aos bancos a unha semana, ata o 2,65 %, e a facilidade de crédito, á que presta aos bancos a un día, ata o 2,90 %

A previsión de crecemento na eurozona queda no 0,9 %, tras unha rebaixa de dúas décimas

Seguramente tamén inflúe na decisión do Banco Central Europeo a previsión de crecemento da economía na eurozona para 2025, que o BCE volve rebaixar en dúas décimas, respecto ao seu anterior prognóstico de setembro, e que deixa no 0,9 %. Respecto a 2026 agarda un crecemento do 1,2 % e do 1,3 % para 2027.

As correccións á baixa para 2025 e 2026 reflicten un descenso das exportacións e a persistente debilidade do investimento, pola elevada incerteza sobre as políticas comerciais e á incerteza sobre as políticas económicas en xeral.

Ademais, elevou dúas décimas a súa previsión de inflación para 2025, ata o 2,3 %. Os expertos do BCE consideran agora que a inflación xeral situarase, en media, no 1,9 % en 2026 e o 2,0 % en 2027, polo que xa se sitúa no obxectivo que é o 2 %.

A revisión á alza da inflación xeral para 2025 reflicte un maior dinamismo dos prezos da enerxía.

A inflación interna segue sendo elevada, engade o BCE, "debido principalmente a que os salarios e os prezos nalgúns sectores están aínda axustándose á anterior escalada da inflación cun atraso considerable".

Con todo, o crecemento dos salarios modérase segundo o esperado, e os beneficios amortecen en parte o impacto sobre a inflación.

O euro apréciase fronte o dólar

 O euro apreciouse este xoves con forza e superou os 1,0850 dólares despois de que o Banco Central Europeo (BCE) baixase os tipos de interese por quinta vez consecutiva e sinalase que é posible unha pausa en abril.

O euro cambiábase ás 16.00 horas GMT a 1,0818 dólares, fronte aos 1,0756 dólares nas últimas horas da negociación europea do mercado de divisas da xornada anterior.

O Banco Central Europeo (BCE) fixou o cambio de referencia do euro en 1,0796 dólares.