O BCE mantén os tipos de xuro no 4,5 por cento tras dez subas consecutivas
O BCE mantén os tipos de xuro no 4,5 por cento tras dez subas consecutivas
A caída da inflación e a contración das economías da zona euro deteñen a senda de incrementos do Banco Central Europeo
![](https://img-g24-crtvg.flumotion.com/prog24/2021/20211130/BCE_frame_778.png)
O Banco Central Europeo (BCE) decidiu este xoves manter os seus tipos de xuro no 4,5 %, despois de que a inflación baixara e a economía se contraera na zona do euro.
Tras a reunión do Consello de Goberno en Atenas, o BCE informou de que tamén deixa sen cambio a facilidade de crédito, a que presta aos bancos a un día, no 4,75 %, e a facilidade de depósito, a que remunera o exceso de reservas a un día, no 4 %.
Desta forma, o instituto emisor pisa o freo tras levar a cabo dez subas consecutivas do prezo do diñeiro, que o situaron no seu nivel máis alto en máis de 20 anos.
O 'gardián do euro' elevou os tipos en 450 puntos básicos durante o actual ciclo de subidas, que deu comezo en xullo do ano pasado e que, agora, interrompeuse nunha decisión que os analistas xa daban por descontada.
A decisión do BCE chega despois de que a taxa de inflación interanual da zona euro se situase en setembro do 4,3 %, nove décimas por baixo da subida de prezos rexistrada no mes anterior e o seu nivel máis baixo en case dous anos.
Ao excluír do cálculo o impacto da enerxía e dos alimentos, o alcol e o tabaco, a taxa subxacente relaxouse ao 4,5 %, oito décimas menos.
Ademais, Eurostat informou en setembro de que o crecemento do PIB da zona euro rexistrou unha contracción do 0,1 % no segundo trimestre de 2023, idéntica cifra á do primeiro tramo do ano.