O BCE sobe os tipos de xuro un 0,50 %

O Banco Central Europeo decidiu este xoves subir os seus tipos de xuro medio punto porcentual, ata o 0,50 %, a primeira suba desde hai once anos, para frear a inflación da zona do euro, que se disparou en xuño ata o 8,6 %, e aprobou un instrumento para que non se disparen as primas de risco dalgúns países.

Tras a reunión do Consello de Goberno, o BCE informou de que tamén incrementa en 50 puntos básicos a facilidade de crédito, a que presta aos bancos a un día, ata o 0,75 %, e a facilidade de depósito, que remunera o exceso de reservas a un día, ata o 0 %.

É a primeira suba dos tipos de xuro desde xullo de 2011. Ademais, os tipos de interese do BCE estiveron no 0 % desde mediados de marzo de 2016 e a taxa da facilidade de depósito foi negativa desde mediados de xuño de 2014.

O Consello de Goberno "decidiu hoxe adoptar novas e importantes medidas para asegurar que a inflación volva situarse no seu obxectivo do 2 % a medio prazo", dixo o BCE nun comunicado.