O Camiño colle forza no inverno, con máis 7.000 peregrinos no que vai de ano

A 12 quilómetros para chegar a Compostela, os peregrinos xa poden facer balance:

"Empecei o día do meu aniversario e foi o mellor agasallo, repetiría sen dúbida".

"Desconectas da rutina, do traballo, conectas coa natureza e o silencio".

Precisamente, escolleron camiñar no inverno para fuxir das masas do verán e non ter problema de espazo nos albergues. A maioría son estranxeiros, con Corea á cabeza. Alí o Camiño causa furor. 

"A xente sempre che axuda, encántame este sitio e encántame a súa xente", din estes camiñantes coreanos que comezaron en Francia.

Aproveitando o Entroido tamén vemos grupos de escolares e familias que camiñan unidas en particulares peregrinacións:

"A nosa é moi particular, celebramos os 600 anos da chegada dos xitanos a España, a nosa etnia, que chegou desde o norte da India. Eu a miña familia quixemos recrear a entrada dos xitanos polos Pireneos facendo o Camiño de Santiago".

E despois de tanto esforzo, nada mellor que repoñer forzas baixo o sol. Contaban con que a comida estivese boa en Galicia, pero non con poder gozar dela nunha terraza no mes de marzo.

"Trouxen o sol de Almería ao norte, sol espléndido".

"Viña desde México coa roupa de auga e non fixo falta para nada, fantástico tempo".

Aínda que seguen sendo minoría, os peregrinos de inverno son cada vez máis, sobre todo no Camiño Francés, onde é máis probable atopar os servizos abertos nunha temporada cada vez menos baixa.