O cocido vegano desafía a tradición cunha receita sen rastro de carne
Cada ano gaña adeptos e xa hai varios restaurantes galegos que o ofertan
Chourizo e costela de soia substitúen o porco nunha destas versións vexetais
A simple vista custa distinguilo, pero que pasará ao probalo? É posible tomar un bo cocido que non contemple o porco na receita?
"Eu non o probei, pero son moi carnívoro, non sei eu"; "Habería que probalo, pero igual non ha de saber"; "Eu prefiro o tradicional, con touciño, con chourizo, con polo..."; "Cocido vegano? Soa ben, así todo o mundo pode gozalo"; "Eu son vexetariana e encántame, así como menos graxa, máis san".
Neste restaurante de Compostela levan catro anos facendo a versión vexetal do cocido, e os encargos non deixan de medrar. Verzas, patacas, garavanzos e petote de millo aparecen acompañados no prato. Pero non de carne, senón de soia.
"Facemos a forma da costela con soia hidratada e un pau de chirimía que simula o óso. A carniña son filetes de soia e tamén poñemos chourizo vexetal. Todo condimentado con pemento picante, porque o adubo dá moito ese sabor característico do cocido", explica Lucía Eiras, do restaurante vegano Entrepedras.
A idea é ofertar unha alternativa a todos aqueles que non comen carne nin proteína de orixe animal. Ou aos que si a comen, pero queren innovar.
"Non só vivimos da clientela vegana. Veñen moitas familias que, ao mellor teñen algún fillo vegano, pero todos proban a nosa carta. Tamén veñen as veciñas, todo tipo de xente que vén probar algo diferente", engade Lucía Eiras.
O viño e o pan veganos para acompañar o cocido tamén están na carta. E para rematar, sobremesas sen leite nin ovo, para poñer o punto doce. Para darlle unha volta á tradición sen renunciar aos praceres do Entroido.
