A Xunta aproba este luns a matrícula gratis para o novo alumnado universitario
A Xunta aproba este luns a matrícula gratis para o novo alumnado universitario
O conselleiro de Educación, Ciencia, Universidades e FP estima un aforro medio de entre 700 e 800 euros por familia
Román Rodríguez apunta que nos vindeiros anos tamén será de balde para estudantes que aproben o curso anterior
Aprobarase tamén a extensión da medida ás ensinanzas artísticas superiores, como música, deseño ou arte dramática
O Consello da Xunta inicia este luns os trámites para modificar o decreto de prezos público co obxectivo de introducir dúas medidas electorais comprometidas polo actual goberno de Alfonso Rueda á fronte da Xunta.
En concreto, a gratuidade das primeiras matrículas de estudos universitarios e ensinanzas artísticas segundo confirmou na Radio Galega o conselleiro de Educación, Ciencia, Universidades e Formación Profesional, Román Rodríguez.
O conselleiro explicou no Galicia por diante fin de semana que a matrícula será gratuíta "para todos os alumnos que entran na universidade este ano e fan a ABAU -a antiga selectividade- e despois nos cursos seguintes, para aqueles alumnos que aproban o curso". Debido a esta circunstancia, Román Rodríguez admite que é "complexo calcular" cantos beneficiarios e canto orzamento é preciso porque pode haber variacións.
Non obstante si estima un aforro medio de "entre 700-800 euros por alumno, por familia que ao longo de todos os cursos é unha cantidade moi substancial". O conselleiro asegura que é unha "medida que busca a equidade social pero tamén é unha medida que ten que calibrar o esforzo", de aí que se pida, non no primeiro curso senón nos seguintes que se aprobe todo o curso.
"No Consello da Xunta, imos iniciar a modificación do decreto de prezos públicos onde se van fixar os aspectos básicos. Neste caso a cuestión máis destacada ten que ver coa incorporación das ensinanzas artísticas e isto faise porque son equivalentes ao grao universitario e nos parecía de xustiza".
De cara a novos retos desta lexislatura no seu departamento, Rodríguez fixo fincapé no Plan de Formación Profesional Galicia 360 para conseguir o abandono escolar cero. Un plan cuxos trámites agardan iniciar "o antes posible" para que a mediados de 2025 poder "ter organizada a implantación do mesmo".
Nova estrutura da Xunta
O conselleiro de Educación tamén abordou os cambios introducidos por Alfonso Rueda no seu novo mandato á fronte do goberno da Xunta. En concreto, o cambio aos luns da reunión do Consello da Xunta.
Román Rodríguez dixo que "se vai marcar o ritmo político da semana" e "fixar prioridades de traballo, de xestión". Confirmou ademais que no Consello da Xunta deste luns se aprobarán cambios na estrutura pero aínda quedará pendente unha segunda fase con nomeamentos.
