O conservador Mitsotakis logra a maioría absoluta en Grecia
O conservador Mitsotakis logra a maioría absoluta en Grecia
O líder de Nova Democracia vence nas lexislativas con máis do 40 % dos votos
A esquerdista Syriza de Alexis Tsipras queda en segundo lugar, coa maior diferencia respecto do primeiro partido desde 1974
Tres partidos de extrema dereita entran no Parlamento
![Kyriakos Mitsotakis saúda os seus simpatizantes en Atenas](https://img-g24-crtvg.flumotion.com/prog24/2023/20230625/mitsotakissaudasimpatizantes.png)
Kyriakos Mitsotakis, líder da dereitista Nova Democracia (ND), venceu nas eleccións xerais deste domingo en Grecia cun 40,5 % do voto, segundo o escrutinio oficial, que alcanza xa o 97 % das papeletas.
Con esa porcentaxe ten garantido un mínimo de 158 escanos sobre os 300 do Parlamento e poderá gobernar en solitario outros catro anos. Revalida asi mandato. Xa prometeu unha Grecia "máis próspera e xusta".
A segunda forza foi a esquerdista Syriza, de Alexis Tsipras, partido que obtivo só un 17,8 % dos votos. A diferenza entre os dous principais partidos é a maior desde 1974, coas primeiras eleccións democráticas en Grecia tras a etapa de ditadura.
Os socialdemócratas de Pasok-Kinal atópanse en terceiro lugar co 12,6 % dos votos, seguidos polo Partido Comunista de Grecia, co 7,3 %.
A gran sorpresa da xornada foi a incorporación ao Parlamento de tres partidos de extrema dereita, tres formacións que superaron o mínimo do 3 % dos votos esixidos por lei: os ultranacionalistas de Solución Grega, os fundamentalistas cristiáns de Niki e os neonazis de Espartanos.
Case ninguén contaba coa chegada destes últimos. Esta formación foi impulsada desde o cárcere por Ilias Kasidiaris, que foi portavoz do partido neonazi Amencer Dourado ata que foi declarado organización criminal.
Kasidiaris cumpre condena por iso. Espartanos, o seu actual partido, obtivo un 4,7 % dos votos.
O obxectivo de Mitsotakis era gobernar en solitario. E neste comicios logoruno cunha ampla vitoria. O 20 de maio venceu cunha diferenza de 20 puntos sobre o partido de Tsipras, pero o resultado só lle permitía gobernar en coalición. Agora o novo sistema coa bonificaciòn de escanos con 50 para o máis votado beneficiou a súa formación. Non lle pasan factura as crises que afrontou desde 2019.