O Coruxo adiántase dúas veces pero acaba perdendo en Ávila (3-2)

O Coruxo plantoulle cara ao Ávila, un rival que ocupa postos de promoción de ascenso. Os de David de Dios mesmo se adiantaron por dúas veces no marcador, con senllos goles dos defensas Borja Marchante, á saída dun córner, e de Naveira, entrando desde atrás. Pero non deron aguantado esa vantaxe.

Foi a tarde do dianteiro local Rivas. Anotou en dúas ocasións, igualando as dúas vantaxes nos minutos 22 e 50 con senllos remates desde dentro da área.

A segunda metade deixou algunha ocasión clara. Martín puido completar o hat trick cun remate cómodo, pero Esteban detívollo abaixo. E outro balón paseou pola área viguesa antes do minuto 87. Foi entón cando Carrión anotou un auténtico golazo, facendo inútil a estirada de Esteban e o esforzo do Coruxo. Os puntos quedaban no Adolfo Suárez.