O Estado alemán pagará facturas do gas de decembro dos consumidores

O Estado alemán asumirá os gastos das facturas de gas do mes de decembro dos consumidores, segundo a axuda aprobada este mércores polo goberno en consello de ministros co obxectivo de paliar os efectos da crise enerxética.

"Os clientes de gas non terán que pagar a cota de decembro. O Estado asume os custos", anunciou o chanceler, Olaf Scholz, na súa conta de Twitter.

O seu portavoz, Steffen Hebestreit, explicou durante unha conferencia de prensa en Berlín que conta con que o Parlamento dea o visto e prace a semana que vén a esta medida, que segundo medios alemáns terá un custo aproximado duns 9.000 millóns de euros.

A axuda beneficiará a particulares e pequenas empresas aínda que só notarán o seu efecto de forma inmediata aqueles que teñan contratos directos cos seus provedores de gas, aos que non deberán abonar a cota de decembro.

Para o resto dos consumidores, que pagan o gas, por exemplo, a través dun importe fixo como parte dos seus contratos de alugueiro, a axuda terá efecto a partir de mediados do ano que vén.

Será entón cando, no momento de recibir dos seus arrendadores a liquidación final dos gastos correspondentes a 2022, obterán un abono en conta polo importe correspondente ao consumo de decembro.

A medida aprobada hoxe constitúe a primeira fase da proposta presentada o mes pasado por unha comisión de expertos para aliviar o impacto da crise enerxética.

O segundo paso, que o Goberno pretende implantar a partir de febreiro ou marzo do ano que vén, é a introdución dun freo aos prezos da electricidade e do gas, a través da subvención dun continxente de arredor do 80 % do consumo habitual dos clientes, que se manterá a un prezo fixo.

Hebestreit afirmou que este mércores terá lugar unha "sesión importante" á hora de sacar adiante esta segunda medida, en referencia a unha reunión do chanceler cos líderes rexionais, e recalcou que o Executivo traballa "baixo presión" para lograr a súa aprobación canto antes.

Todas estas axudas financiaranse a través dun orzamento extraordinario coñecido como Fondo de Estabilización que será dotado antes de finais de ano de 200.000 millóns de euros para ser investidos de aquí a 2024.