O Exército israelí recoñece que o ataque ao convoi de WCK foi un erro por crer que ían membros de Hamas

O ataque do pasado luns a un convoi humanitario de World Central Kitchen (WCK) debeuse a un "erro" ao crer que nel viaxaban dous milicianos armados de Hamas, polo que dous comandantes implicados na operación serán cesados e outros dous amoestados, segundo a investigación do exército israelí.

A investigación concluíu que as forzas israelís identificaron a dous "pistoleiros" nos camións de axuda mentres o convoi se dirixía a un almacén en Deir al Balah, e cando os vehículos abandonaron o lugar tras a descarga, "un dos comandantes supuxo erroneamente que os pistoleiros ían dentro dos vehículos e que se trataba de terroristas de Hamas".

Esta é a conclusión fundamental da pescuda independente encargada polo Exército ao Mecanismo de Investigación e Avaliación de Feitos (FFAM), un corpo liderado polo maior xeral Yoav Har Even, encargado de ofrecer a maior información posible para decidir se se abre unha investigación criminal sobre incidentes en combate.

Os achados da investigación foron presentados onte ao xefe do Estado Maior das Forzas de Defensa de Israel, Herzi Halevi, e feitos públicos este venres, cando tamén levaron a cabo sesións informativas con embaixadores e corpo diplomático.

"As forzas non identificaron os vehículos en cuestión como asociados a WCK. Tras unha identificación errónea por parte das forzas, atacaron aos tres vehículos WCK baseándose na clasificación errónea do evento e a identificación errónea de que os vehículos tiñan axentes de Hamas no seu interior", sinala a investigación.

O ataque contra o convoi humanitario da ONG estadounidense World Central Kitchen (WCK), fundada polo chef español José Andrés, cobrouse a vida de sete dos seus empregados: o palestino Saifeddin Ayad Abutaha, a australiana Lalzawmi Frankcom, o polaco Damian Soból, o canadense-estadounidense Jacob Flickinger e os británicos John Chapman, James Henderson e James Kirby.

Aínda que ía perfectamente identificado, o convoi de WCK recibiu o impacto de tres mísiles disparados por un dron, o que foi "unha grave violación das ordes e dos procedementos operativos estándar das Forza de Defensa de Israel", concluíu. "Os achados da investigación indican que o incidente non debería ocorrer. Quen aprobou o ataque estaba convencido de que o seu obxectivo eran axentes armados de Hamas e non empregados de WCK", indicou o FFAM, que tamén apuntou "erros na toma de decisións".

Tras analizar as conclusións do informe, o xefe do Estado Maior, Herzi Halevi, adoptou as seguintes medidas: cesar ao comandante de apoio de lume da brigada, un oficial con rango de maior; e ao xefe da brigada, un coronel na reserva; ademais de amoestar aos comandantes tanto da brigada como da 162.ª división, que opera no centro da Franxa. Ademais, Halevi "reprenderá formalmente" ao xefe do Comando Sur, pola súa responsabilidade xeral no incidente.

O exército asegurou que considera "de vital importancia" a actividade das axencias humanitarias na Franxa e comprometeuse a garantir a súa seguridade. Israel anunciou hoxe a súa intención de permitir máis entrada de axuda ao enclave, e de abrir o cruzamento de Erez polo norte, despois dunha tensa chamada telefónica onte entre o primeiro ministro Benjamin Netanyahu e o presidente estadounidense, Joe Biden, quen o ameazou con retirar o apoio se non melloraba a situación humanitaria na Franxa e facían máis por protexer aos civís.