O festival SonRías Baixas celebrarase o 1, 2 e 3 de agosto en Bueu

O festival SonRías Baixas celebrará a súa edición número vinte e unha os días 1, 2 e 3 de agosto de 2024. Este é un dos eventos musicais máis lonxevos que se organiza en Galicia.

Aínda que non se coñecen os artistas que comporán a oferta deste ano, a principios do vindeiro mes de xaneiro concretaranse máis detalles sobre os artistas convidados este ano, así como tamén sobre a venda das entradas, segundo anunciaron dende a organización.

Este festival, que cada ano se celebra no Concello de Bueu, en Pontevedra, reuniu na súa anterior edición a máis de 22.000 persoas ao longo dos tres días, batendo o seu récord histórico. Este evento xerou un enorme impacto económico en toda a comarca do Morrazo, que superou os 1,5 millóns de euros.

Algúns dos artistas que participaron na edición do 2023 do SonRías Baixas foron Lendakaris Muertos, Boikot, Natos y Waor, La Pegatina, Macaco, Arde Bogotá, Pili Pampín e Ortiga e Grande Amore, entre outros.