O furacán Rafael provoca enormes danos e un novo apagón total na illa de Cuba

O Goberno cubano recoñeceu este mércores na súa primeira avaliación de danos tras o paso polo occidente da illa do furacán Rafael con categoría 3 (de cinco) na escala Saffir-Simpson que as afectacións en vivendas, infraestrutura e a agricultura foron "moi fortes".

O ciclón tocou terra ás 16:20 hora local (21:20 GMT) pola costa sur da provincia de Artemisa e deixou territorio cubano máis de dúas horas máis tarde pola costa norte de Pinar del Río. O Instituto Meteorolóxico (INSMET) de Cuba mediu ventos de ata 185 quilómetros por hora e rexistrou intensas choivas de ata 200 milímetros (ou litros por metro cadrado).

O presidente do país Miguel Díaz-Canel escribiu en redes sociais ao cabo dunha reunión do Consello de Defensa Nacional que se rexistraron "grandes afectacións en Artemisa, Mayabeque e A Habana", tres provincias occidentais.

Avanzou así mesmo que ten previsto visitar desde este xoves "os territorios máis impactados polo furacán". "Xa comeza un novo proceso de recuperación", indicou. Pola súa banda, o primeiro ministro Manuel Marrero agregou nunha intervención especial na televisión estatal que os danos foron "moi fortes nas vivendas, infraestrutura e agricultura".

Explicou ademais que o apagamento total que provocou no país este ciclón, o segundo evento de "cero cobertura enerxética nacional" en apenas dúas semanas, está aínda por avaliar debido ás inclemencias meteorolóxicas.

Á complexidade técnica do restablecemento do Servizo Eléctrico Nacional hai que engadir a reparación física de cables e postes estragados polos fortes ventos, explicou a este respecto en redes sociais o Ministerio de Enerxía e Minas, quen demandou "tempo" para a recuperación.

"Trabállase na creación de subsistemas eléctricos no centro e o oriente de Cuba. En occidente este proceso será máis lento, débense revisar as liñas e as instalacións eléctricas necesarias", referiu o MINED.

Marrero concluíu a súa intervención dicindo: "Teñan a seguridade de que nos recuperaremos e sairemos adiante. Ata a vitoria sempre!". Rafael afectou a máis de catro millóns de cubanos e os seus estragos comezarán a ser visibles a partir deste xoves.

Este é o segundo furacán que toca terra en Cuba no que vai de ano. O anterior, Óscar, pasou hai algo máis de dúas semanas polo extremo nororiental da illa e deixou oito mortos, danos en 12.000 vivendas e 13.000 hectáreas de cultivos danadas.