O Goberno aproba o novo plan climático, que reduce as emisións de gases e aposta polas renovables

O Consello de Ministros deste martes prevé aprobar o Plan Nacional Integrado de Enerxía e Clima (PNIEC), no que se establecen os obxectivos xerais da política enerxética e climática do Goberno de aquí a 2030.

O plan, que será remitido a Bruxelas, foi cualificado pola vicepresidenta terceira, Teresa Ribera, como "un documento capital que rece unha orientación clara para o investimento".

O plan prevé xerar un investimento de 308.000 millóns de euros, e no que mantén que en 2030 haberá 5,5 millóns de vehículos eléctricos e que nesa data só quedarán por pechar 3 centrais nucleares.

O Consello de Ministros aprobou na súa reunión deste martes a actualización do PNIEC, tras recibir o borrador da revisión, dado a coñecer en xuño, máis de 12.000 achegas e a da Comisión Europea.

Nesa actualización, o Goberno español prevé un crecemento da demanda eléctrica do 34 % en 2030 respecto a 2019, fronte ao 5 % que calculaba no PNIEC que elaborou en 2021 e que agora se revisa, e tamén un aumento da produción de enerxía autóctona, que alcanzaría o 50 % do total en 2030, fronte ao 27 % que representaba en 2019, o que permitiría a España aforrar 86.750 millóns de euros en combustibles fósiles.

O Ministerio para a Transición Ecolóxica reduciu neste caso a cifra de aforro respecto ao borrador que presentou en xuño, en que era de 90.700 millóns de euros, ao revisar os prezos dos combustibles.

Segundo explicou Teresa Ribeira na conferencia de prensa posterior ao Consello de Ministros, no plan aumentan os obxectivos de cada unha das tecnoloxías renovables ao final da década, ao excederse xa, especialmente no caso da solar, os previstos.

O novo plan ten 110 medidas fronte ás 78 do de 2021 e eleva a redución das emisións de gases de efecto de invernadoiro (GEI) ata o 32 %.

O seu obxectivo é que as enerxías renovables en 2030 xeren o 81 % da electricidade, fronte ao 74 % que se estimaba en 2021, e cubrirían o 48 % da enerxía final.

Ademais, a demanda eléctrica experimentará un gran crecemento, do 34 % respecto a 2019, fronte ao 5 % que se calculaba que aumentaría para 2030 en 2021.

O PNIEC xerará 308.000 millóns de investimento

Con eses crecementos, os investimentos para todo o período 2021-2030 ascenden a 308.000 millóns de euros, fronte aos 241.000 millóns estimados no plan que agora se revisa.

Un 82 % dese investimento corresponderá á iniciativa privada, un 18 % será publica, representando dentro desta un 13 % os fondos europeos.

O 37 % do investimento total será para enerxías renovables, un 28 % para aforro e eficiencia, un 17 % para redes enerxéticas e un 17 % para electrificación da economía, que agora se prevé que chegue ao 35 % en 2030.

Así mesmo, o obxectivo é que a potencia instalada renovable aumente en 105 xigawatts (GW), ata chegar aos 160 GW en 2030.

A esa data habería 76 GW de enerxía fotovoltaica (con 19 GW de autoconsumo), 62 GW de eólica, 22,5 GW de almacenamento e 12 GW de electrolizadores para producir hidróxeno verde.

O plan atense ao calendario de peche nuclear

A enerxía nuclear queda en 3,2 GW en 2030, xa que o plan contempla a execución do protocolo para o peche ordenado do parque, que prevé que a última central en España se clausure en 2035, e o sétimo plan de residuos nucleares, co que ao final da década só operarán tres nucleares (Ascó II, Vandellós e Trillo) e a potencia instalada pasará dos 7,4 GW actuais a 3,2 GW en 2030.

Fronte á redución da presenza da nuclear, a eólica pasa de 50 GW nas previsións de 2021 a 62 GW; mentres que a previsión para a fotovoltaica dóbrase, con 76 GW en 2030, e as previsións para o hidróxeno verde triplícanse, ata os 12 GW en 2030.

A potencia instalada dos ciclos combinados de gas mantense en 2030 nos 26,61 GW, a coxeración redúcese ata quedar en 3,78 GW en 2030 e o carbón desaparece tal e como se prevía.

Tamén melloran as previsións para o almacenamento, cuxa estimación de 20 GW para 2030 que se fixo en 2021 pasa agora a 22,5 GW.

O PNIEC tamén eleva os seus obxectivos de rehabilitación de vivendas, que pasan dos 1,2 millóns previstas en 2021 a 1,37 millóns na do plan que agora se manda a Bruxelas, e eleva a 5,5 millóns o número de vehículos eléctricos en España para 2030, fronte aos 5 millóns que prognosticou en 2021.

A pesar das dúbidas sobre que se poida alcanzar esa cifra, dada a evolución das vendas de vehículos eléctricos en España, o Ministerio para a Transición Ecolóxica decidiu conservar o obxectivo de 5,5 millóns para 2030, que xa incluíu no borrador da previsión que presentou en xuño e supón medio millón máis que nos obxectivos de 2021.

Redución do gasto enerxético das familias

A eficiencia enerxética e a integración de renovables vai permitir reducir o gasto enerxético medio das familias, que en 2019 equivalía ao 7,8 % do seu orzamento e que, segundo as previsións do plan, pasaría ao 5,7 % ao final da década, con maior incidencia nos fogares de renda baixa.

Outras previsións son que o PIB creza un 3,2 % respecto a o que ocorrería se non se aplicasen as medidas do PNIEC, fronte ao incremento do 1,8 % estimado en 2021, e que se cren 560.000 empregos, fronte aos 348.000 previstos no PNIEC anterior.