O Goberno autoriza o desmantelamento da central nuclear de Santa María de Garoña

O Ministerio para a Transición Ecolóxica (MITECO) autorizou o inicio do desmantelamento da central nuclear de Santa María de Garoña, un proxecto que abarca ata 2033, cun orzamento de 475 millóns de euros e no que se prevé que ata 350 persoas traballen de forma simultánea.

Autoriza a transferencia de titularidade da instalación de Nuclenor a Enresa, algo que sucederá nos próximos días para que poidan dar comezo as obras sobre o terreo.

Garoña é "un exemplo do que non debese volver ocorrer", afirmou Teresa Ribeira, ministra para a Transición Ecolóxica.

"Hoxe dáse un paso adiante nese proceso ordenado de peche con total "responsabilidade, con garantías para a poboación e con alternativas económicas", despois de superar a avaliación ambiental do proceso de desmantelamento seguro e sen risco para ninguén, observou a ministra.

O Ministerio de Transición Ecolóxica, mediante o Instituto para a Transición Xusta (ITJ), colabora desde 2020 cos 27 concellos afectados polo peche da instalación e xa destinou 7,7 millóns a financiar 12 proxectos municipais.

Garoña, situada no Valle de Tobalina (Burgos), tiña unha potencia instalada de 466 MW, inaugurouse en 1971 e desconectouse da rede eléctrica en decembro de 2012, cando Nuclenor comunicou ao Ministerio de Industria, Enerxía e Turismo a súa decisión de non seguir explotándoa.

En xullo de 2013 declarouse o cesamento definitivo de explotación, pero este non se debía a razóns de seguridade nuclear ou protección radiolóxica, de modo que Nuclenor presentou unha solicitude de renovación da autorización en maio de 2014; finalmente, en agosto de 2017, esta solicitude foi denegada polo Ministerio de Enerxía, Turismo e Axenda Dixital.

Un proxecto con dúas fases

Nese momento Enresa comezou os traballos preparatorios do desmantelamento. Na Fase 1 (2023-2026) desmontaranse os sistemas, estruturas e compoñentes do edificio de turbina, e acometeranse as modificacións de sistemas e instalacións necesarias para a xestión dos residuos resultantes. Á vez, evacuarase o combustible gastado desde a piscina ata o almacén temporal individualizado da central.

Posteriormente, na Fase 2 (2027-2033), xa co combustible no almacén temporal individualizado, abordarase o desmantelamento final dos edificios de carácter radiolóxico, continuando coas descontaminacións, desclasificacións e demolicións, para, finalmente, concluír coa restauración do emprazamento.

A autorización para o desmantelamento chega despois de que o proxecto se sometese a información pública entre marzo e abril de 2021, de que o Pleno do Consello de Seguridade Nuclear (CSN) emitise un informe favorable o pasado mes de maio e tras obter a declaración de impacto ambiental coas condicións axustadas ao proxecto.