O Goberno chega a un acordo con Sumar para derrogar algúns artigos da lei mordaza
O Goberno chega a un acordo con Sumar para derrogar algúns artigos da lei mordaza
Revisarán o Código Penal no relativo aos delitos de inxurias á Coroa e a outras institucións do Estado ou ás ofensas contra sentimentos relixiosos
![A voceira do Goberno, Pilar Alegría na rolda de prensa tralo Consello de Ministros. EFE/ Kiko Huesca](https://img-g24-crtvg.flumotion.com/prog24/2024/20240716/alegria.jpg)
A parte socialista do Goberno informou este martes de que chegara a un acordo con Sumar para "revisar" o Código Penal no relativo aos delitos de inxurias á Coroa e a outras institucións do Estado ou ás ofensas contra sentimentos relixiosos.
Horas despois de que a vicepresidenta segunda e representante de Sumar no Executivo, Yolanda Díaz, anunciara un acordo para derrogar a lei mordaza entre a súa formación e o PSOE, os socialistas matizan que o acordo só se refire aos mencionados delitos e afecta unicamente a un artigo da lei mordaza, para que deixe de ser infracción a toma ou difusión de imaxes de policías en manifestacións.
A aclaración que fai a ala socialista do Goberno vai na mesma liña da expresada polo voceiro adxunto de Sumar. Enrique Santiago apuntou que o acordo anunciado por Díaz só afecta a este artigo da lei, relativo ás imaxes dos policías.
As fontes do Goberno consultadas apuntan ademais que o pacto implica simplemente "que se abre o debate" e que están dispostos a "revisar" eses delitos, pero aseguran que aínda non se concretou por escrito. De feito, deixan claro que non está redactado aínda e nin sequera fixeron o intento de recollelo nun texto, de modo que aínda non se poden coñecer os detalles.
Neste sentido, a vicepresidenta primeira e ministra de Facenda, María Jesús Montero, sinala que a derrogación da lei mordaza está a tramitarse no Congreso dos Deputados e había "dificultades" con algúns grupos parlamentarios, pois cada un trata de incluír as materias que considera imprescindibles, segundo indicou na conferencia de prensa posterior ao Consello de Ministros.
Respecto a Sumar, segundo indica, están a falar dos delitos de inxurias, é dicir, "a parte da lei mordaza que ten que ver coa liberdade de expresión", indica. Por ese motivo "está no paquete de rexeneración democrática" que vai presentar o presidente do Goberno, Pedro Sánchez, este mércores no Congreso dos Deputados.
Na mesma liña deixou claro que o acordo con Sumar se refire unicamente a ese apartado da lei mordaza, pero o resto da norma séguese traballando e discutindo cos socios parlamentarios do Executivo.