O Goberno dá luz verde á norma para a futura cohesión do Sistema Nacional de Saúde
O Goberno dá luz verde á norma para a futura cohesión do Sistema Nacional de Saúde
A nova lei tentará garantir o dereito á protección da saúde en todo o territorio nacional en condicións de igualdade
![](https://img-g24-crtvg.flumotion.com/prog24/2022/20220529/MEDICOSEATENCIONPRIMARIA_frame_2637.png)
O Consello de Ministros aprobou este martes o proxecto para a nova lei de cohesión do Sistema Nacional de Saúde (SNS), un marco co que se tratará de garantir o dereito á protección da saúde en todo o territorio nacional en condicións de igualdade.
O proxecto inclúe medidas para fortalecer a cohesión e a equidade no SNS incorporando medidas que faciliten o desenvolvemento de políticas públicas de saúde máis eficaces e eficientes e avanzar cara a unha cultura social que inclúa a saúde en todas as políticas.
Ademais crease o Foro Aberto de Saúde, un órgano de asesoramento que incorpora a voz dos pacientes que poden formular propostas sobre o funcionamento da saúde.
A ministra de Sanidade, Mónica García, explicou que o Foro Aberto é unha "demanda histórica" dos pacientes e informou de que o proxecto de lei introduce a obrigatoriedade de avaliar o impacto en saúde nas Memorias de Análises de Impacto Normativo (MAIN) de todas as normas que afecten a sectores clave como vivenda, educación, medio ambiente ou transporte.
As novas iniciativas sumarase así a outras dúas que a ministra de Sanidade Mónica García elevou recentemente ao Consello de Ministros: unha para restaurar a universalidade do Sistema Nacional de Saúde e outra para priorizar a xestión pública dos servizos e limitar os concertos sanitarios.
O proxecto incluirá medidas para fortalecer a cohesión e a equidade no SNS, facilitando a viabilidade do desenvolvemento regulamentario do Fondo de Garantía Asistencial.
García tamén explicou que este martes aprobouse un real decreto polo que se crea a rede estatal de vixilancia en saúde pública, que inclúe o sistema de alerta precoz e resposta rápida para identificar, en menos de 24 horas, todas as situacións que poñen en perigo a saúde pública.
Sanidade distribúe 68 millóns de euros ás comunidades para a saúde bucodental
O Consello de Ministros tamén aprobou a distribución de 68 millóns de euros ás comunidades autónomas para ampliar as coberturas de saúde bucodental e fortalecer a atención odontolóxica pública en todo o territorio.
A ministra de Sanidade, Mónica García, informou de que con esta partida o plan de saúde bucodental 2024 consolida a súa expansión -cun investimento total de 180 millóns- e continúa dando prioridade á poboación infanto-xuvenil, persoas con discapacidade e procesos oncolóxicos en fases cervicofaciais.
Para 2024, o obxectivo do plan é ofrecer a toda a poboación información e recomendacións sanitarias individualizadas sobre as medidas básicas hixiénicas e dietéticas necesarias para manter a saúde oral.