O Goberno extinguirá a Fundación Francisco Franco por facer apoloxía da ditadura

O ministro de Política Territorial e Memoria Democrática, Ángel Víctor Torres, asegurou este venres que a Fundación Francisco Franco está nos seus "últimos días", aínda que matizou as intencións do Executivo explicando que non pretenden ilegalizala senón "extinguila".

"Nós non ilegalizamos a fundación, o que facemos é extinguila, se unha fundación, un espazo, un lugar, rememora, homenaxea, vangloria a alguén que foi represor, non ten ningún sentido dentro da democracia", explicou nunha entrevista na Cadena Ser, recollida por Europa Press, onde ademais, asegurou que estamos ante os "últimos días" da Fundación Francisco Franco.

O pasado mes de febreiro, o propio Torres avanzaba que o Goberno faría "o que teña que facer" para ilegalizar esta fundación, aínda que evitaba concretar datas de cando se vai producir. Ao ser preguntado polos cambios que está a levar a cabo a fundación para tentar adaptarse á lei de Memoria Democrática, Torres cre que "non" van poder esquivar a norma.

Máis tarde, tamén este venres, o propio Torres asegurou que "a lei di claramente que non caben fundacións que vanglorian a aquelas persoas, colectivos ou asociacións que fixeron apoloxía do franquismo, que defenderon o totalitarismo e a ditadura. Por tanto, non cabe a Fundación Francisco Franco, en ningún caso. E o que se vai facer é extinguila".

O ministro realizaba estas declaracións durante unha visita a un dos símbolos da represión da ditadura, a colonia agrícola penal de Tefía, en Forteventura, onde o réxime que gobernou España desde 1936 ata 1975 recluíu durante anos a persoas do colectivo LGTBI só pola súa condición sexual.

O titular de Memoria Democrática precisou que non compete ao seu ministerio, senón ao de Cultura, en cuxo rexistro se atopa esta fundación, pero tamén discutiron xa ese asunto co ministro Ernest Urtasun, que "coñece ben os pasos para dar".

"Por tanto, toda fundación ou asociación que defenda ao ditador ou a quen facía apoloxía da ditadura, ten que estar eliminada da democracia, pero iso non é nada novo: iso é propio da Lei de Memoria Democrática e do dereito internacional, é propio das convencións das Nacións Unidas, dos seus convenios e as súas resolucións en defensa dos dereitos humanos", argumentou.

A Fundación Franco avisa dunha "dura loita" nos tribunais se "queren calalos"

A Fundación Francisco Franco advertiu ao Goberno de que se enfrontará a unha "dura loita" nos tribunais se acomete calquera medida que a extinga, que entenden como a pretensión de "calalos", á vez que denunciou que usan a Franco para "desviar a atención".

Así o fixo en declaracións a Europa Press o director da Fundación Nacional Francisco Franco, o xeneral Juan Chicharro, despois das manifestacións do ministro de Política Territorial e Memoria Democrática.

Chicharro cre que os plans do Executivo non chegarán a materializarse porque significaría "violentar" o artigo 22 da Constitución, que recoñece o dereito de asociación. Segundo defende, o Goberno tería primeiro que "reformar" a Carta Magna. Do mesmo xeito, avisou de que non poden extinguir a Fundación a través dun real decreto lei, "que é o que pretenden", porque o dereito de asociación é un dereito fundamental.

Nesta liña, lembrou que a Fundación retocou os seus estatutos en xuño do ano pasado para acomodalos á Lei de Memoria Democrática, e sostivo que a organización cumpre coa norma.

Así, o xeneral augurou "unha dura loita" nos tribunais se o Goberno segue adiante na súa pretensión de "calalos". Chicharro sostén que o labor da Fundación Francisco Franco é necesaria para achegar á cidadanía a "obra social" levada a cabo na ditadura e que se coñeza que o "obxectivo" do réxime era a "prosperidade" e a "orde". Por último, Chicharro acusou ao Goberno de querer "desviar a atención" dos seus problemas "usando" a figura de Francisco Franco.