O Goberno fixará en 48 horas o prazo máximo para reparar Internet e fixos

O Goberno prevé obrigar os operadores a que reparen as avarías nos servizos de banda ancha e servizo de voz de liñas fixas en menos de 48 horas, independentemente de onde se resida, e que a instalación da conexión inicial sexa en menos de 60 días.

Esta obrigatoriedade reflíctese no borrador de orde pola que se convoca a licitación pública para a designación de operador encargado da prestación do servizo universal de telecomunicacións, é dicir, a banda ancha e o servizo de voz desde unha conexión fixa, segundo informaron fontes da Comisión Nacional de Mercados e da Competencia (CNMC).

Deste servizo universal obrigatorio para todos os cidadáns, independentemente de onde residan, xa se eliminaron as cabinas de teléfono e as guías de numeracións como consecuencia da lei de telecomunicacións que se aprobou recentemente e que fixa con todo unha velocidade mínima das conexións por Internet de 10 megabits por segundo.

De acordo con este borrador, o operador designado deberá garantir trimestralmente para o conxunto de todos os abonados certos obxectivos de calidade como o tempo de subministración da conexión inicial sexa inferior a 60 días para o 99 % dos casos e o tempo de reparación máxima 48 horas, para o 95 %.

A porcentaxe de avarías fixado por liña de acceso ten que ser menor do 4 % ao trimestre e a taxa de reclamacións por facturación inferior ao 5 por mil ao trimestre.

Ata o 31 de decembro de 2022, Telefónica España é o operador encargado da prestación do servizo universal de telecomunicacións.

A Secretaría de Estado de Telecomunicacións e Infraestruturas Dixitais (SETID) remitiu á CNMC este borrador de orde para unha licitación para un período de dous anos, a diferenza doutras ocasións que era para un período de tres anos.

O servizo universal garante que todos os cidadáns teñan acceso a unha serie de servizos con independencia de onde vivan ou traballen, cunha calidade determinada e a un prezo alcanzable, o que inclúe levar a rede de telecomunicacións a calquera punto do Estado, incluídas as zonas non rendibles.

Por primeira vez esíxese aos operadores que apliquen prezos alcanzables non só en relación cos servizos de comunicacións vocais, senón tamén pola prestación do servizo de acceso a Internet de banda ancha.

A CNMC propón que, a través dos instrumentos adecuados, se considere incorporar algunha previsión sobre a accesibilidade do servizo de acceso a Internet tanto para xubilados e pensionistas con renda familiar baixa, como para determinados colectivos (usuarios cegos ou con grave discapacidade visual e usuarios xordos ou mudos ou con graves dificultades auditivas ou da fala).

O organismo regulador supervisará a evolución e o nivel da tarificación ao público destes servizos.