O incendio dunha furgoneta deixa sen luz un pavillón deportivo en Marín

A Policía Nacional investiga o incendio dunha furgoneta, en plena madrugada, no barrio de San Pedro, en Marín. O lume espallouse ata o cadro eléctrico do pavillón da Raña, que quedou sen subminsitración eléctrica. Os técnicos municipais avisaron os adestradores, que buscaron as zonas con luz natural para traballar.

Os veciños xa non se sorprenden. Din que os incendios, de colectores sobre todo e tamén dalgún vehículo, véñense repetindo nos últimos meses. Todo fai pensar que se trata de incendios intencionados e reclaman máis vixilancia. 

Os traballadores municipais tentan xa devolver a subministración eléctrica canto antes ao pavillón.