O IPC sobe ao 3,6 % polo encarecemento da electricidade

O Índice de Prezos de Consumo (IPC) subiu en maio ao 3,6 % interanual, tres décimas máis que o mes anterior, polo encarecemento da electricidade e unha menor baixada dos carburantes, mentres a inflación dos alimentos se moderou tres décimas, ata o 4,4 %.

O Instituto Nacional de Estatística (INE) confirmou este xoves o dato de inflación adiantado hai dúas semanas, cuxo aumento se debe á subida dos prezos da electricidade, fronte á baixada en maio do ano pasado, e a un menor abaratamento dos carburantes. Confírmase igualmente a taxa de inflación subxacente (sen enerxía nin alimentos non elaborados), que se situou no 3 % interanual, unha décima máis que en abril.

Pola súa banda, o prezo dos alimentos e bebidas non alcohólicas moderou en maio o seu avance interanual ao 4,4 %, tres décimas menos que en abril, debido, na súa maior parte, aos incrementos dos prezos das froitas e a carne, menores que no mesmo mes de 2023, e á baixada dos prezos dos aceites e graxas, fronte á subida que experimentaron en maio do ano pasado.

O Ministerio de Economía, Comercio e Empresa destacou que esta taxa do 4,4 % no grupo de alimentos é unha das máis baixas desde novembro de 2021 e implica unha redución de máis de 12 puntos no último ano. 

En termos mensuais (maio sobre abril), o IPC aumentou un 0,3 % tras subir os prezos do vestido e o calzado pola nova tempada primavera-verán (2,3 %), os servizos de aloxamento e restauración, e a vivenda, por mor dos prezos da electricidade.

Por contra, o grupo de transportes recortou a súa taxa mensual un 0,6 % polo abaratamento dos carburantes respecto ao mes anterior. Co avance mensual de maio, o IPC encadea o seu quinto incremento mensual consecutivo, aínda que o de maio foi o máis moderado desde xaneiro. O que máis subiu de prezo no mes de maio respecto ao mes anterior foron os voos nacionais (7,7 %) e os hoteis, hostais e pensións (7,4 %).

Segundo os datos de Estatística, o que máis se abaratou no mes foi o gasóleo (3,6 %). O aceite de oliva, pola súa banda, baixou o seu prezo un 2,1 % respecto ao mes anterior, rexistrando o seu primeiro recorte mensual desde xaneiro de 2023.

O IPC repunta en Galicia ao 4 % interanual

O Índice de Prezos de Consumo (IPC) repuntou en maio en Galicia ao 4 % interanual, tres décimas máis ca o mes anterior, polo encarecemento da electricidade e unha menor baixada dos carburantes, mentres a inflación dos alimentos se moderou seis décimas na comunidade autónoma, ata o 5 %.

Deste xeito, Galicia volve ter os prezos máis altos de España no mes de maio, do mesmo xeito que xa sucedeu en abril; tamén nos alimentos, aínda que neste grupo a baixada respecto ao mesmo mes de 2023 é o dobre que no conxunto de España, seis décimas contra tres.