O IPC sobe ao 3 % polo encarecemento da electricidade e os alimentos

O índice de prezos de consumo (IPC) subiu en febreiro ao 3 % interanual, unha décima máis que o mes anterior, polo encarecemento da electricidade que se elevou un 28 %, mentres que a inflación dos alimentos aumentou catro décimas, ata o 2,2 %.

O Instituto Nacional de Estatística (INE) confirmou este venres o dato de inflación adiantado hai dúas semanas para febreiro, un mes en que a inflación subxacente (sen enerxía nin alimentos non elaborados) situouse no 2,2 %, dúas décimas menos que a taxa de xaneiro.

O incremento da taxa xeral, a máis alta desde xuño de 2024 e que supón encadear cinco meses á alza, reflicte a suba dos prezos da electricidade, que se dispararon un 28,1 % en taxa anual influído polos cambios nos impostos.

Esta subida da electricidade elevou un 9,8 % a taxa anual do grupo vivenda, onde se inclúen estas subministracións. Fronte a isto, moderáronse os prezos do transporte, cunha taxa do 0,3 %, grazas ao comportamento en comparativa anual dos carburantes e lubricantes para vehículos persoais.

Os alimentos soben un 2,2 %

Dentro do grupo de alimentación, con esa taxa anual da 2,2 % fronte ao 1,8 % de xaneiro, rexistráronse distintos comportamentos con fortes descensos en aceites e graxas, que se moderaron un 25,2 % en taxa anual, ou no azucre, cunha baixada do 15,2 %. Fronte a isto, subiron en taxa anual con forza grupos como a carne de vacún, un 10,6 %, ou o café, o cacao e as infusións, un 12,7 %.

Ao detalle por produtos, o aceite de oliva baixa en taxa anual un 32,3 % e, no extremos oposto, o chocolate dispárase un 24,1 %.

Desde o Ministerio de Economía destacaron esa baixada do prezo do aceite de oliva e valoraron que a inflación subxacente siga reducíndose ata a taxa máis baixa desde fai máis de tres anos. "Nun contexto de incerteza internacional, España segue mantendo o maior crecemento entre as principais economías da zona euro, que está a ser compatible cunha moderación dos prezos e as ganancias de poder adquisitivo dos cidadáns", engade Economía.

Por rexións, o IPC rexistrou taxas anuais positivas en todas as comunidades autónomas en febreiro con Baleares coa taxa máis elevada (3,6 %) e Canarias a máis baixa (2,2 %).

O Índice de Prezos de Consumo subiu en febreiro en Galicia un 0,2% en relación co mes anterior

O Índice de Prezos de Consumo subiu en febreiro en Galicia un 0,2 % en relación co mes anterior, pero mantivo a súa taxa interanual no 2,7 %, tres décimas por baixo do dato do conxunto estatal, segundo a información que publica este venres o Instituto Nacional de Estatística.

Na Comunidade galega, a taxa interanual máis elevada anótaa a vivenda, que subiu un 9,7 % nos últimos 12 meses, mentres que o prezo do lecer e a cultura se mantivo estable. Pola súa banda, os alimentos e bebidas non alcohólicas aumentaron de prezo un 1,6 %, mentres que as bebidas alcohólicas e o tabaco subiron un 3,4 % entre febreiro de 2024 e o mesmo mes de 2025.

O vestido e o calzado encareceuse un 0,7 %. Ademais, o enxoval fixo o propio un 0,6 %, do mesmo xeito que a medicina (2,5 %), o transporte (0,7 %) e as comunicacións (1,9 %). O ensino tamén subiu un 2,6 %, do mesmo xeito que os hoteis, os cafés e os restaurantes, un 4,1 %.

No que vai de ano, os prezos en Galicia subiron un 0,4 %; de novo é a vivenda a que rexistra un maior aumento, cun 4,4 % máis, mentres que cae o calzado e o vestido un 13,1 % (época de rebaixas).