O IPC subiu en xaneiro ao 2,9 %, unha décima menos do esperado, polo encarecemento de gasolinas e luz

O Instituto Nacional de Estatística (INE) rebaixou o índice de prezos ao consumo (IPC) de xaneiro ao 2,9 %, unha décima menos do que avanzara hai dúas semanas, o que sitúa a taxa unha décima por encima da rexistrada en decembro do pasado ano (2,8 %) debido ao encarecemento da enerxía.

O INE revisou este venres á baixa a taxa anual de IPC -que, aínda así, segue sendo a máis elevada desde xuño de 2024-, pero mantén no 2,4 % a inflación subxacente -que non ten en conta a enerxía nin os alimentos non elaborados por ser os compoñentes máis volátiles-, dúas décimas por baixo da de decembro.

Detrás desta repunta está en encarecemento da enerxía, tanto a dos carburantes -o que disparou a inflación do transporte ata o 1,3 %, sete décimas máis- como da electricidade -que elevou a subida do prezo do compoñente de vivenda ao 7,9 %, cinco décimas máis-. Pola contra, o compoñente que máis contribuíu a moderar os prezos foi o de lecer e cultura, que aínda que se encareceu un 1,9 %, fíxoo 1,3 puntos menos que en decembro grazas ao abaratamento dos paquetes turísticos.

A inflación encadea así catro meses consecutivos á alza, desde que marcase un mínimo do 1,5 % en setembro do pasado ano, aínda que fontes do Ministerio de Economía destacaron que o crecemento económico "está a ser compatible cunha moderación dos prezos e as ganancias de poder adquisitivo dos cidadáns".

Polo que respecta aos alimentos, os seus prezos aumentaron un 1,8 % en xaneiro en comparación co mesmo mes do ano anterior, a mesma taxa que en decembro, cun forte descenso do aceite de oliva, do 21,9 %. Entre os alimentos que máis se encareceron en xaneiro figuran as carnes, sobre todo a de ovino (9,2 %) e vacún (8,6 %), mentres que os aceites e graxas baixaron un 16,4 % e o azucre, un 14,9 %.

O Ministerio de Economía, Comercio e Empresa subliñou nun comunicado que a repunta da inflación en xaneiro ata o 2,9 % explícase polo aumento dos prezos dos carburantes e da electricidade, á vez que destacou que a inflación dos alimentos mantívose en xaneiro no 1,8 %, máis dun punto por baixo da inflación xeral.

"Neste bo comportamento é especialmente relevante a baixada do prezo do aceite de oliva, un 21,9 % no último ano", subliña o Departamento que dirixe Carlos Corpo. Co avance do IPC interanual no primeiro mes do ano 2025, a inflación encadea catro meses consecutivos de ascensos e alcanza o seu valor máis alto desde xuño, cando se situou no 3,4 %.

Pola súa banda, a inflación subxacente (sen alimentos non elaborados nin produtos enerxéticos) diminuíu dúas décimas en xaneiro, ata o 2,4%, quedando seis décimas por baixo do índice xeral. Este dato coincide co avanzado por Estatística a finais do mes pasado. "España segue mantendo o maior crecemento entre as principais economías da zona euro, que está a ser compatible cunha moderación dos prezos e as ganancias de poder adquisitivo dos cidadáns", resaltou Economía.