O IPC baixa sete décimas en marzo, ata o 2,3 %, polo abaratamento de electricidade e gasolinas
A inflación subxacente baixa dúas décimas, ata o 2 %
A abundante chuvia deste mes de marzo é un dos factores que contribuíu ao descenso dos prezos da enerxía
O abaratamento da gasolina, un dos factores clave na baixada do IPC
O índice de prezos de consumo (IPC) subiu un 0,1 % en marzo en relación ao mes anterior, pero respecto á súa taxa interanual recortou sete décimas para situarse no 2,3 %, o seu valor máis baixo desde o pasado mes de outubro, cando se situou no 1,8 %, segundo os datos avanzados este venres polo Instituto Nacional de Estatística (INE).
O organismo explicou que o descenso do IPC ata o 2,3 % se debe ao abaratamento da electricidade, fronte á repunta de prezos que experimentou en marzo de 2024.
De feito, o Ministerio de Economía relacionou nun comunicado a "importante baixada" do IPC de marzo coa caída dos prezos da electricidade polas fortes choivas rexistradas este mes.
Amais tamén influíu no descenso do IPC en que houbo unha baixada dos prezos dos carburantes e lubricantes para vehículos persoais e en que os prezos de lecer e cultura subiron menos que en marzo do ano pasado.
Co descenso do IPC interanual no terceiro mes do ano, a inflación pon fin a cinco meses consecutivos de ascensos.
O INE incorpora no avance de datos do IPC unha estimación da inflación subxacente (sen alimentos non elaborados nin produtos enerxéticos), que en marzo diminuíu dúas décimas, ata o 2 %, tres décimas por baixo do índice xeral.
"Venres con boas noticias para a economía das familias. Segundo os datos de avance do IPC do INE, a inflación xeral redúcese sete décimas en marzo e sitúase no 2,3 %. E a subxacente segue baixando ata o 2 %, a taxa máis baixa en máis de tres anos", destacou o ministro de Economía, Carlos Cuerpo, na súa conta de X.
Sánchez fala dun dato "magnífico"
O presidente do Goberno, Pedro Sánchez, cualificou de "magnífico" o dato de inflación coñecido este venres e fíxoo durante a súa intervención nun foro organizado por eldiario.es, onde tamén dixo que os datos demostran "un acerto claro da política económica -e desde o punto de vista enerxético-" levada a cabo por parte do Goberno.
Sánchez sostén que as medidas que está a tomar o seu Goberno xa chegaron ás economías familiares.
"Se iso significa algo, é que os fogares están gañando poder adquisitivo, e sobre todo as rendas máis baixas, as que sofren máis a inflación. E ademais, segundo o Banco de España, a riqueza das familias está en máximos históricos", asegurou o presidente do Goberno.
O INE publicará os datos definitivos do IPC de marzo o próximo 11 de abril.
