A inflación moderouse ao 2,3 % en marzo pola electricidade e os carburantes
A taxa de variación anual da inflación subxacente, o índice sen alimentos non elaborados nin produtos enerxéticos, diminuíu dúas décimas, ata o 2 %, a máis baixa desde novembro de 2021
A inflación creceu por baixo do 2 % en Galicia no mes de marzo pola electricidade
A inflación moderouse sete décimas en marzo, ata o 2,3 %, debido ao descenso da electricidade e os combustibles, mentres que os alimentos subiron un 2,4 %, segundo o dato confirmado este venres polo Instituto Nacional de Estatística.
A evolución de marzo sitúa a inflación no nivel máis baixo desde outubro do ano pasado, cando a taxa era do 1,8 %. O INE tamén confirmou que a taxa de variación anual da inflación subxacente, o índice sen alimentos non elaborados nin produtos enerxéticos, diminuíu dúas décimas, ata o 2 %, a máis baixa desde novembro de 2021.
O grupo de vivenda recortou máis de catro puntos a súa taxa interanual en marzo, ata o 5,7 %, polo abaratamento da electricidade, en tanto que o grupo de transporte reduciu 1,2 puntos a súa taxa interanual, ata o 0, 9%, polo descenso dos prezos dos carburantes e lubricantes para vehículos persoais.
Pola súa banda, o grupo de lecer e cultura recortou 1,7 puntos a súa taxa interanual, ata o 0,3 %, debido a que as subidas dos prezos dos paquetes turísticos foron menores que en marzo de 2024.
O Ministerio de Economía, Comercio e Empresa subliñou nun comunicado que, nun contexto de elevada incerteza internacional, España séguese mantendo como a grande economía que máis crece na zona euro, e este crecemento está a ser compatible cunha moderación dos prezos e as ganancias de poder adquisitivo dos cidadáns.
O Departamento que dirixe Carlos Cuerpo destacou ademais que o aceite de oliva acentuou a súa baixada en marzo, de tal forma que no último ano abaratou un 37,9 %.
Pola súa banda, o IPC harmonizado (IPCA) diminuíu sete décimas en marzo, ata unha taxa interanual do 2,2 %, mentres que se incrementou un 0,7 % en valores mensuais.
A inflación creceu por baixo do 2 % en Galicia no mes de marzo
A inflación moderouse en Galicia en marzo, cun crecemento do 1,9 % respecto ao mesmo mes do ano anterior, catro décimas menos que no conxunto de España e oito décimas menos respecto ao dato interanual de febreiro.
O descenso débese, principalmente, á baixada dos prezos da electricidade e os combustibles, mentres que os alimentos moderaron o seu ascenso en marzo ata o 1,3 %, segundo o dato confirmado este venres polo Instituto Nacional de Estatística.
